విశ్వకర్మ జయంతి: ప్రభుత్వ సెలవు, పింఛన్, రక్షణ కల్పించాలి - కామారెడ్డిలో సంఘం డిమాండ్

విశ్వకర్మ జయంతి సందర్భంగా కామారెడ్డి జిల్లా కలెక్టర్ కార్యాలయంలో జరిగిన పూజా కార్యక్రమంలో విశ్వబ్రాహ్మణ విశ్వకర్మ ఐక్య సంఘం నాయకులు పాల్గొన్నారు. ఈ సందర్భంగా వారు పలు డిమాండ్లను ప్రభుత్వానికి విన్నవించారు. విశ్వకర్మ జయంతిని అధికారికంగా నిర్వహించాలని, పింఛన్, రక్షణ కల్పించాలని కోరారు.

విశ్వకర్మ జయంతి సందర్భంగా కామారెడ్డి జిల్లా కలెక్టర్ కార్యాలయంలో జరిగిన పూజా కార్యక్రమంలో విశ్వబ్రాహ్మణ విశ్వకర్మ ఐక్య సంఘం కామారెడ్డి జిల్లా అధ్యక్షులు దేమే కమ్మరి రాజు చారి, జిల్లా కోశాధికారి నాగభూషణం చారి, జిల్లా ప్రచార కార్యదర్శి కమ్మరి శంకర్ చారి, రాజంపేట మండల అధ్యక్షులు కమ్మరి నాగరాజు చారి, నాయకులు శంకర్ చారి, హనుమండ్లు చారి, రాములు చారి, వెంకటేష్ చారి తదితరులు పాల్గొన్నారు. ఈ సందర్భంగా వారు మాట్లాడుతూ, విశ్వకర్మ జయంతిని గ్రామస్థాయి నుండి మండల, జిల్లా స్థాయి వరకు అధికారికంగా ఉత్సవాలు జరుపుతూ ప్రభుత్వ సెలవుదినంగా ప్రకటించాలని కోరారు. విశ్వబ్రాహ్మణులకు ఎటువంటి షరతులు లేకుండా, 50 సంవత్సరాలు వయసు కలిగిన ప్రతి కుటుంబ సభ్యునికి ప్రభుత్వం నెలకు 5000 రూపాయల పింఛన్ ఇవ్వాలని విజ్ఞప్తి చేశారు. స్వర్ణకారులపై దొంగ బంగారం అమ్మకాలు, ఇతర అరాచకాలను అరికట్టి వారికి పూర్తి రక్షణ కల్పించాలని వారు డిమాండ్ చేశారు. కార్పెంటర్లకు అవసరమైన కలప రవాణాలో అటవీ అధికారులు అనేక ఇబ్బందులు సృష్టిస్తూ వారిని వేధిస్తున్నారని ఆరోపించారు. స్వర్ణకారులు, వడ్రంగి పని చేసేవారికి ప్రభుత్వ అధికారుల నుండి ఎటువంటి ఒత్తిడి లేకుండా చూడాలని కోరారు. వడ్రంగి పని వారికి ప్రభుత్వం సబ్సిడీపై కలపను సరఫరా చేయాలని విజ్ఞప్తి చేశారు.

విశ్వబ్రాహ్మణులు, పంచదాయిల వంటి కులవృత్తులపై ప్రభుత్వ అధికారులు అనవసరమైన అభియోగాలతో శాఖాపరమైన చర్యలు చేపట్టవలసి వస్తే, తమ దృష్టికి తీసుకురావాలని, అప్పుడు తాము వారితో మాట్లాడి సమన్వయం చేసి ఎవరికీ ఇబ్బంది కలగకుండా చూస్తామని తెలిపారు. తమకు తెలియకుండా తమ వారిపై ఏవైనా కఠిన చర్యలు తీసుకున్నట్లయితే, న్యాయం జరిగే వరకు పోరాటాలు చేస్తామని, ధర్నాలు, ర్యాలీలు, రాస్తారోకోలు, పలు కార్యాలయాల ముట్టడి వంటి కార్యక్రమాలు నిర్వహిస్తామని, జిల్లా, రాష్ట్ర నాయకులతో పాటు మండల, గ్రామ కార్యవర్గాలతో కలిసి పెద్ద ఎత్తున కార్యక్రమాలు చేపడతామని కామారెడ్డి జిల్లా అధ్యక్షులు దేమే కమ్మరి రాజు చారి హెచ్చరించారు. జై విశ్వకర్మ జై జై విశ్వకర్మ