పశ్చిమాసియాలో అమెరికాఇరాన్ మధ్య ఉద్రిక్తతలు కొనసాగుతున్న నేపథ్యంలో, పర్షియన్ గల్ఫ్లో అమెరికా సైనిక చర్యలు, నౌకల రాకపోకల విషయంలో జోక్యం చేసుకోవద్దని ఇరాన్ హెచ్చరించింది. హోర్ముజ్ జలసంధి సమీపంలో రెండు భారీ చమురు నౌకలు సముద్రపు మందుపాతరలను ఢీకొన్నాయని ఇరాన్ ఇస్లామిక్ రివల్యూషనరీ గార్డ్ కార్ప్స్ (ఐఆర్జీసీ) ప్రకటించింది.
ఇరాన్ అధికారిక వార్తా సంస్థల ప్రకారం, హోర్ముజ్ జలసంధికి దక్షిణ భాగంలో అనుమతి లేని మార్గంలో ప్రయాణించేందుకు ప్రయత్నించిన రెండు భారీ చమురు నౌకలు సముద్రపు మందుపాతరలను ఢీకొన్నాయి. ఈ ఘటనలతో నౌకల ఇంజిన్ గదుల్లో పేలుళ్లు, మంటలు చెలరేగినట్లు ఐఆర్జీసీ తెలిపింది. రెండు నౌకలు పనిచేయకుండా నిలిచిపోయాయని, వాటిలోని సిబ్బంది నౌకలను విడిచి వెళ్లినట్లు పేర్కొంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ రెండు నౌకల్లో కలిపి 45 లక్షల బ్యారెళ్లకు పైగా ముడి చమురు ఉన్నట్లు ఇరాన్ వర్గాలు వెల్లడించాయి. అయితే, నౌకల పేర్లు, వాటి యాజమాన్యం, ఘటనల్లో ఎవరైనా గాయపడ్డారా అనే వివరాలు వెంటనే వెల్లడికాలేదు. ఇరాన్ చేసిన వాదనలను స్వతంత్రంగా ధ్రువీకరించిన సమాచారం అందుబాటులో లేదని అంతర్జాతీయ వార్తా నివేదికలు పేర్కొన్నాయి.
