రైళ్లలో రాత్రిపూట మొబైల్ ఛార్జింగ్ పై నిషేధం: రైల్వే బోర్డు కీలక ఆదేశాలు

ఇటీవల ముంబయి లోకల్ రైలులో ఛార్జింగ్ పెడుతుండగా ఓ ప్రయాణికుడి పవర్ బ్యాంక్ పేలిపోయిన సంగతి తెలిసిందే. దీంతో కోచ్ అంతా దట్టమైన పొగతో నిండిపోయింది. ఈ నేపథ్యంలోనే తాజా ఉత్తర్వులు జారీ అయ్యాయి. రాత్రి 11 గంటల నుంచి ఉదయం 6 గంటల పాటు రైళ్ల కోచ్లలోని మొబైల్, ల్యాప్టాప్ ఛార్జింగ్ పాయింట్లను స్విచ్ఛాఫ్ చేసేలా సిబ్బందికి శిక్షణ ఇవ్వాలని అన్ని జోన్లకు బోర్డు సూచించింది. అధికారులు ఆకస్మిక తనిఖీలు నిర్వహించాలని ఉత్తర్వుల్లో పేర్కొన్నారు. ఈ భద్రతా చర్యలను అమలు చేయడంలో ఎలాంటి నిర్లక్ష్యం ఉండకూడదని హెచ్చరించింది.

అగ్నిప్రమాదాల నివారణకు ముందు జాగ్రత్త

రాత్రి సమయంలో ప్రయాణికులు గాఢ నిద్రలో ఉన్నప్పుడు ఓవర్ హీటింగ్, షార్ట్ సర్క్యూట్ జరిగితే వెంటనే గుర్తించడం కష్టమవుతుంది. దీంతో భారీ అగ్నిప్రమాదాలు జరిగే అవకాశం ఉన్నందున ఈ ముందు జాగ్రత్త చర్య చేపట్టారు.

2014 నిబంధనల అమలుపై దృష్టి

అయితే, రైళ్లలో రాత్రిపూట ఛార్జింగ్ పై ఆంక్షలు 2014లోనే విధించారు. తాజా ఘటన నేపథ్యంలో వీటిని కట్టుదిట్టంగా అమలు చేసేలా రైల్వే బోర్డు ఆదేశాలు జారీ చేసింది.