ఉత్తరాఖండ్ రాష్ట్ర నూతన గవర్నర్గా డాక్టర్ ధాల్ సింగ్ బిసేన్ సోమవారం ప్రమాణ స్వీకారం చేశారు. డెహ్రాడూన్లోని లోక్ భవన్లో జరిగిన కార్యక్రమంలో ఉత్తరాఖండ్ హైకోర్టు తాత్కాలిక ప్రధాన న్యాయమూర్తి మనోజ్ కుమార్ తివారీ ఆయనతో ప్రమాణం చేయించారు. ఈ కార్యక్రమానికి ముఖ్యమంత్రి పుష్కర్ సింగ్ ధామి, రాష్ట్ర మంత్రులు, ఉన్నతాధికారులు హాజరయ్యారు.
ధాల్ సింగ్ బిసేన్ ఉత్తరాఖండ్ తొమ్మిదో గవర్నర్గా బాధ్యతలు చేపట్టడంపై ముఖ్యమంత్రి పుష్కర్ సింగ్ ధామి అభినందనలు తెలిపారు. బిసేన్కు సుదీర్ఘ రాజకీయ, పరిపాలనా అనుభవం ఉందని, ఆయన అనుభవం రాష్ట్ర అభివృద్ధికి ఉపయోగపడుతుందని ఆశాభావం వ్యక్తం చేశారు. ప్రజాసేవ పట్ల నిబద్ధత, రాజ్యాంగ విలువల పరిరక్షణ రాష్ట్రంలో ప్రజాస్వామ్య సంప్రదాయాలను బలోపేతం చేయడానికి దోహదపడతాయని పేర్కొన్నారు. ఆయన విజయవంతమైన పదవీకాలం కొనసాగాలని ఆకాంక్షించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
అభివృద్ధికి ప్రాధాన్యం
ప్రమాణ స్వీకారం అనంతరం ధాల్ సింగ్ బిసేన్ మాట్లాడుతూ, ఉత్తరాఖండ్ రాష్ట్రానికి సేవ చేసే అవకాశం కల్పించిన జాతీయ నాయకత్వానికి కృతజ్ఞతలు తెలిపారు. ఉత్తరాఖండ్ ఆధ్యాత్మిక విశ్వాసాలకు, సంస్కృతికి కేంద్రంగా ఉండటంతో పాటు దేశ రక్షణలో కీలక పాత్ర పోషిస్తున్న సైనికుల రాష్ట్రంగా కూడా గుర్తింపు పొందిందని పేర్కొన్నారు. గవర్నర్గా రాజ్యాంగ విలువలను కాపాడటం, పదవి గౌరవాన్ని నిలబెట్టడం తన ప్రధాన బాధ్యతలని బిసేన్ తెలిపారు. రాష్ట్ర ప్రభుత్వం, ప్రజలతో కలిసి విద్య, వైద్యం, వ్యవసాయం, పర్యాటకం, పర్యావరణ పరిరక్షణ, ఉపాధి, ప్రజా సంక్షేమ రంగాల్లో అభివృద్ధికి సహకరిస్తానని చెప్పారు. రాష్ట్రంలో శాంతి, భద్రత, సమృద్ధి సాధించడమే లక్ష్యమని వివరించారు.
