భారత తొలి ఉప ప్రధానమంత్రి, ఉక్కు మనిషి సర్దార్ వల్లభాయ్ పటేల్ 151వ జయంతి సందర్భంగా ప్రధానమంత్రి నరేంద్ర మోదీ ఆయనకు ఘనంగా నివాళులర్పించారు. గుజరాత్లోని ఏక్తా నగర్లో ఉన్న స్టాట్యూ ఆఫ్ యూనిటీ వద్ద పుష్పాంజలి ఘటించి ఆయన సేవలను స్మరించుకున్నారు. సర్దార్ వల్లభాయ్ పటేల్ జయంతిని దేశవ్యాప్తంగా జాతీయ ఐక్యతా దినోత్సవం (రాష్ట్రీయ ఏక్తా దివస్)గా జరుపుకుంటారు.
ఈ సందర్భంగా ప్రధాని మోదీ సోషల్ మీడియా వేదిక ఎక్స్లో సర్దార్ వల్లభాయ్ పటేల్కు నివాళులర్పించారు. పటేల్ను అఖండ భారత రూపశిల్పి, దేశ ఉక్కు మనిషిగా అభివర్ణించారు. బలమైన, సంపన్నమైన, సమర్థవంతమైన భారతదేశ నిర్మాణం కోసం ఆయన తన జీవితాన్ని అంకితం చేశారని పేర్కొన్నారు. దేశ సేవలో ఆయన చేసిన త్యాగం, అంకితభావం అభివృద్ధి చెందిన, స్వయం సమృద్ధి భారతదేశ నిర్మాణానికి స్ఫూర్తినిస్తాయని మోదీ తెలిపారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
అమిత్ షా నివాళులు
కేంద్ర హోంమంత్రి అమిత్ షా కూడా సర్దార్ వల్లభాయ్ పటేల్కు నివాళులర్పించారు. ఆధునిక భారతదేశ నిర్మాణంలో పటేల్ కీలక పాత్ర పోషించారని పేర్కొన్నారు. స్వాతంత్ర్యం అనంతరం అనేక సంస్థానాలుగా విడిపోయిన భారతదేశాన్ని ఒకే దేశంగా ఏకం చేయడంలో పటేల్ తన ధైర్యం, దూరదృష్టితో కీలక పాత్ర పోషించారని తెలిపారు. అంతేకాకుండా ఆల్ ఇండియా సర్వీసెస్ వ్యవస్థ ఏర్పాటులోనూ ఆయన కీలక పాత్ర పోషించారని గుర్తుచేశారు.
రైతుల హక్కుల కోసం పోరాడిన నాయకుడు
సర్దార్ వల్లభాయ్ పటేల్ రైతుల హక్కుల కోసం చేసిన పోరాటాలను అమిత్ షా ప్రత్యేకంగా ప్రస్తావించారు. ఖేడా సత్యాగ్రహం: రైతుల పన్నుల సమస్యలపై బ్రిటిష్ ప్రభుత్వానికి వ్యతిరేకంగా పోరాటం. బార్డోలీ సత్యాగ్రహం: రైతులపై పెంచిన భూమి పన్నులకు వ్యతిరేకంగా ఉద్యమం. ఈ ఉద్యమాలు ప్రజాసేవ, నాయకత్వానికి గొప్ప ఉదాహరణలుగా నిలిచాయని అమిత్ షా పేర్కొన్నారు.