రోడ్డు ప్రమాద బాధితులకు కేంద్రం అండ: రూ.1.50 లక్షల వరకు నగదు రహిత చికిత్స, సహాయం చేసిన వారికి రూ.25 వేల ప్రోత్సాహం

ఈ పథకం కింద రోడ్డు ప్రమాద బాధితులకు ఒక్కొక్కరికి గరిష్టంగా రూ.1,50,000 వరకు నగదు రహిత వైద్య చికిత్స అందించబడుతుంది. ప్రమాదం జరిగిన తేదీ నుంచి గరిష్టంగా ఏడు రోజుల వరకు ఈ వైద్యసేవలు అందుబాటులో ఉంటాయి. ప్రమాద బాధితులు డబ్బుల కొరతతో వైద్యం అందక ఇబ్బందులు పడకుండా, సకాలంలో చికిత్స అందించి ప్రాణాలను కాపాడటమే ఈ పథకం ముఖ్య ఉద్దేశ్యం.

రోడ్డు ప్రమాదాల్లో గాయపడిన వారిని వెంటనే ఆసుపత్రికి తరలించి, ప్రాణాలు కాపాడిన వారికి ప్రభుత్వం రూ.25,000 నగదు ప్రోత్సాహకాన్ని అందిస్తుంది. అంతేకాకుండా ప్రశంసాపత్రం కూడా అందజేయబడుతుంది. ప్రమాద సమయంలో బాధితులకు సహాయం చేసేందుకు ముందుకు వచ్చే వ్యక్తులను ప్రోత్సహించడమే ఈ పథకం ముఖ్య ఉద్దేశ్యం.

రోడ్డు ప్రమాదం జరిగినప్పుడు బాధితులను చూసి భయపడకుండా, మానవతా దృక్పథంతో వెంటనే సహాయం చేయాలని కామారెడ్డి టౌన్ పోలీసులు ప్రజలకు విజ్ఞప్తి చేశారు. ప్రమాద బాధితులకు సహాయం చేయడం ప్రతి ఒక్కరి సామాజిక బాధ్యత అని వారు సూచించారు.