తమిళనాడు మాజీ మంత్రి, డీఎంకే సీనియర్ నేత కేఎన్ నెహ్రూ నివాసంలో అవినీతి నిరోధక విభాగం (డీవీఏసీ) అధికారులు సోదాలు నిర్వహించారు. ప్రభుత్వ ఉద్యోగాల నియామకాల్లో అక్రమాలు జరిగాయన్న ఆరోపణలపై రాష్ట్రవ్యాప్తంగా 25 ప్రాంతాల్లో ఏకకాలంలో తనిఖీలు చేపట్టారు. తిరుచ్చిలోని నెహ్రూ నివాసానికి ఉదయం అధికారులు చేరుకున్నారు.
తిరుచ్చిలోని తిల్లై నగర్లో ఉన్న నెహ్రూ నివాసానికి ఉదయం సుమారు 7 గంటలకు అధికారులు చేరుకుని సోదాలు ప్రారంభించారు. ఆ సమయంలో నెహ్రూ ఇంట్లోనే ఉన్నట్లు సమాచారం. ఈ విషయం తెలియడంతో పెద్ద సంఖ్యలో డీఎంకే కార్యకర్తలు ఆయన నివాసం వద్దకు చేరుకున్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
రూ.634 కోట్ల ఉద్యోగాల కుంభకోణం ఆరోపణలు
నెహ్రూ గతంలో మున్సిపల్ పరిపాలన, నీటి సరఫరా శాఖ మంత్రిగా పనిచేసిన సమయంలో ప్రభుత్వ ఉద్యోగాల నియామకాల్లో అక్రమాలు జరిగినట్లు ఆరోపణలు ఉన్నాయి. ఆ శాఖలో 2,538 పోస్టుల భర్తీకి సంబంధించి అభ్యర్థుల నుంచి సుమారు రూ.634 కోట్ల లంచం వసూలు చేసినట్లు ఎన్ఫోర్స్మెంట్ డైరెక్టరేట్ (ఈడీ) ఆరోపించింది. ఈ వ్యవహారానికి సంబంధించి 2020లో ఈడీ తమిళనాడు పోలీసులకు వివరాలు, పత్రాలు అందించినట్లు వార్తా కథనాలు పేర్కొన్నాయి. అసిస్టెంట్ ఇంజనీర్లు, జూనియర్ ఇంజనీర్లు, టౌన్ ప్లానింగ్ అధికారులు వంటి పోస్టుల భర్తీలో డబ్బులు వసూలు చేసినట్లు దర్యాప్తు సంస్థ అనుమానిస్తోంది. ఈ నగదు లావాదేవీలు హవాలా మార్గంలో జరిగినట్లు డీవీఏసీ తన ప్రకటనలో పేర్కొన్నట్లు సమాచారం.
ఐదు జిల్లాల్లో దాడులు
తిరుచ్చి, చెన్నై, కోయంబత్తూరు, నామక్కల్, తిరునెల్వేలి జిల్లాలతో పాటు మొత్తం 25 ప్రాంతాల్లో అధికారులు తనిఖీలు చేపట్టారు. నెహ్రూ సోదరుడు కేఎన్ రవిచంద్రన్కు చెందిన చెన్నై నివాసంతో పాటు, ఆయన కుటుంబ సభ్యులు, ఇతర సంబంధిత వ్యక్తులకు చెందిన ప్రదేశాల్లోనూ సోదాలు జరిగాయి. ఉద్యోగ నియామకాలు, ఆర్థిక లావాదేవీలకు సంబంధించిన పత్రాలు, డిజిటల్ ఆధారాలను అధికారులు పరిశీలించారు.