వైద్య విద్యలో పోస్టు గ్రాడ్యుయేషన్ ప్రవేశాలకు నిర్వహించే నీట్ పీజీ విధానంలో కీలక మార్పులు చోటుచేసుకోనున్నాయి. ప్రస్తుతం అమల్లో ఉన్న పర్సంటైల్ ఆధారిత అర్హత విధానానికి బదులుగా ర్యాంకుల ఆధారంగా మెరిట్ జాబితాను రూపొందించాలని కేంద్ర ప్రభుత్వం నియమించిన 12 మంది సభ్యుల నిపుణుల కమిటీ సిఫార్సు చేసింది. ఈ ప్రతిపాదనకు జాతీయ వైద్య కమిషన్ సూత్రప్రాయంగా ఆమోదం తెలిపింది.
ప్రస్తుతం నీట్ పీజీ ఫలితాల్లో అభ్యర్థులకు పర్సంటైల్ ఆధారంగా అర్హత నిర్ణయిస్తున్నారు. కౌన్సెలింగ్ చివరి దశల్లో సీట్లు ఖాళీగా మిగిలితే అర్హత పర్సంటైల్ను తగ్గించే నిర్ణయం తీసుకుంటున్నారు. దీనివల్ల తక్కువ మార్కులు, కొన్ని సందర్భాల్లో ప్రతికూల మార్కులు వచ్చిన అభ్యర్థులు కూడా కౌన్సెలింగ్కు అర్హులవుతున్నారు. కొత్త ప్రతిపాదన ప్రకారం అభ్యర్థుల పరీక్షా ప్రతిభ ఆధారంగా ర్యాంకులు ప్రకటించి, వాటి ఆధారంగా ప్రవేశాల ప్రక్రియ చేపట్టనున్నారు. ఫలితాల్లో పర్సంటైల్ మార్కులను ప్రకటించకుండా కేవలం ర్యాంకులు మాత్రమే వెల్లడించే విధంగా నిబంధనలు రూపొందించనున్నట్లు కమిటీ నివేదికలో పేర్కొన్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
కొత్త విధానం వల్ల ప్రయోజనాలు
ఈ మార్పుతో కౌన్సెలింగ్ ప్రక్రియలో ఆలస్యం తగ్గుతుందని, రెండో విడత, మూడో విడత కౌన్సెలింగ్ మధ్య సమయం తగ్గే అవకాశం ఉంటుందని నిపుణుల కమిటీ అభిప్రాయపడింది. అయితే కొత్త విధానానికి సంబంధించిన పూర్తి నిబంధనలు ఇంకా ఖరారు కాలేదు.
అసలు వివాదం ఎందుకు మొదలైంది
2025-26 విద్యా సంవత్సరానికి సంబంధించిన నీట్ పీజీ కౌన్సెలింగ్లో భారీగా సీట్లు ఖాళీగా ఉండటంతో అర్హత ప్రమాణాలను తగ్గించారు. నేషనల్ బోర్డ్ ఆఫ్ ఎగ్జామినేషన్స్ ఇన్ మెడికల్ సైన్సెస్ సవరించిన కటాఫ్ వివరాలను ప్రకటించింది. ఈ మార్పుల ప్రకారం, జనరల్ / ఈడబ్ల్యూఎస్ అభ్యర్థుల కటాఫ్ 50వ పర్సంటైల్ నుంచి 7వ పర్సంటైల్కు, జనరల్ దివ్యాంగుల కటాఫ్ 45వ పర్సంటైల్ నుంచి 5వ పర్సంటైల్కు, ఎస్సీ / ఎస్టీ / ఓబీసీ అభ్యర్థుల కటాఫ్ 40వ పర్సంటైల్ నుంచి 0 పర్సంటైల్కు తగ్గింది. మార్కుల పరంగా జనరల్ / ఈడబ్ల్యూఎస్ అభ్యర్థుల కటాఫ్ 276 నుంచి 103కు, జనరల్ దివ్యాంగుల కటాఫ్ 255 నుంచి 90కు, ఎస్సీ, ఎస్టీ, ఓబీసీ అభ్యర్థుల కటాఫ్ 235 నుంచి మైనస్ 40 మార్కులకు తగ్గింది. దీంతో ప్రతికూల మార్కులు వచ్చినవారికి కూడా కౌన్సెలింగ్లో పాల్గొనే అవకాశం ఏర్పడింది.