జర్మనీలో యువత చేపట్టిన జెన్జీ నిరసనలు తీవ్ర ఉద్రిక్తతలకు దారితీశాయి. తొలుత ప్రశాంతంగా సాగిన ఆందోళనలు రాత్రి వేళ హింసాత్మకంగా మారాయి. పలు నగరాల్లో ఆందోళనకారులు దుకాణాల అద్దాలు ధ్వంసం చేసి వస్తువులను దోచుకున్నారు. పోలీసులపై రాళ్లు, బాటిళ్లు, బాణసంచా, పెట్రోల్ బాంబులతో దాడులకు దిగారు. పరిస్థితిని అదుపులోకి తీసుకొచ్చేందుకు పోలీసులు వాటర్ క్యానన్లు, బాష్పవాయువు ప్రయోగించారు.
ఫ్రాంక్ఫర్ట్లో దుకాణాల లూటీ
జర్మనీలోని ఫ్రాంక్ఫర్ట్లో పరిస్థితి తీవ్రంగా మారింది. ముసుగులు ధరించిన కొందరు ఆందోళనకారులు ప్రధాన వాణిజ్య వీధిలోని దుకాణాల అద్దాలను పగులగొట్టి వస్తువులను ఎత్తుకెళ్లారు. జైల్ షాపింగ్ వీధిలోని పలు దుకాణాలు ధ్వంసమయ్యాయి. ఒక తుపాకుల దుకాణాన్ని కూడా లక్ష్యంగా చేసుకున్నారు. అక్కడి నుంచి ఆయుధాలు చోరీకి గురైనట్లు పోలీసులు తెలిపారు. అనంతరం వాటిలో కొన్నింటిని స్వాధీనం చేసుకున్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఆందోళనకారులు పోలీసులపై రాళ్లు, బాటిళ్లు, పెట్రోల్ బాంబులు విసిరారు. పరిస్థితిని అదుపు చేసేందుకు భారీగా పోలీసు బలగాలను మోహరించారు. హెలికాప్టర్లు, సాయుధ వాహనాలు, వాటర్ క్యానన్లను వినియోగించారు.
హాంబర్గ్, బెర్లిన్, కొలోన్లోనూ హింస
ఫ్రాంక్ఫర్ట్తో పాటు హాంబర్గ్, బెర్లిన్, కొలోన్ నగరాల్లోనూ నిరసనలు హింసాత్మకంగా మారాయి. హాంబర్గ్లో ఆందోళనకారులు రోడ్లపై అడ్డంకులు ఏర్పాటు చేసి వాటికి నిప్పంటించారు. పోలీసులపై రాళ్లు, బాటిళ్లు, బాణసంచా విసిరారు. దీంతో పోలీసులు వాటర్ క్యానన్లు ప్రయోగించి గుంపులను చెదరగొట్టారు. కొలోన్లో పోలీసులపై దాడులు జరగడంతో అధికారులు నిరసన ప్రదర్శనను మధ్యలోనే నిలిపివేశారు. బెర్లిన్లో జరిగిన మరో నిరసనలో పోలీసులు, ఆందోళనకారుల మధ్య ఘర్షణలు చోటుచేసుకున్నాయి. రాళ్లు, బాణసంచా విసరడంతో 27 మంది పోలీసు సిబ్బందికి స్వల్ప గాయాలయ్యాయి. దాదాపు 60 మందిని పోలీసులు అదుపులోకి తీసుకున్నారు.