కెన్యా రాజధాని నైరోబీలో నిర్మాణంలో ఉన్న 18 అంతస్తుల భవనం శుక్రవారం మధ్యాహ్నం కుప్పకూలింది. ఈ దుర్ఘటనతో ఆ ప్రాంతమంతా దుమ్ము, ధూళితో నిండిపోయింది. భవనం శిథిలాల కింద పలువురు చిక్కుకుని ఉండవచ్చని అధికారులు అనుమానిస్తున్నారు. వెంటనే సహాయక బృందాలు గాలింపు చర్యలు చేపట్టాయి.
నగరంలోని రద్దీగా ఉండే ఈస్ట్లీ ప్రాంతంలో ఈ ఘటన చోటుచేసుకుంది. ఈస్ట్లీ ప్రాంతం వాణిజ్య కార్యకలాపాలకు కేంద్రంగా ఉంది. ప్రమాదం జరిగిన సమయంలో భవనం కింది అంతస్తులో దుకాణాలు పనిచేస్తుండగా, పై అంతస్తుల్లో నిర్మాణ పనులు కొనసాగుతున్నట్లు సమాచారం. భవనం కూలిపోవడంతో కార్మికులు, దుకాణాల్లో ఉన్నవారు, అటుగా వెళ్తున్నవారికి ప్రమాదం జరిగి ఉండవచ్చని ఆందోళన వ్యక్తమవుతోంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
శిథిలాల కింద చిక్కుకున్న వారి కోసం గాలింపు
కెన్యా అంతర్గత వ్యవహారాల మంత్రి తెలిపిన వివరాల ప్రకారం, ఏడుగురు కనిపించకుండా పోయినట్లు సమాచారం అందింది. నిర్మాణ పనుల్లో పాల్గొన్న 67 మందిలో 66 మంది సురక్షితంగా బయటపడగా, ఒకరు గాయపడినట్లు వెల్లడించారు. శిథిలాల నుంచి ఓ మహిళను రక్షించి ఆసుపత్రికి తరలించినట్లు వార్తా సంస్థలు పేర్కొన్నాయి. అయితే, గల్లంతైన వారి పరిస్థితిపై పూర్తి స్పష్టత రావాల్సి ఉంది.
సహాయక చర్యలకు ఆటంకాలు
భవనం చుట్టూ ఇతర ఎత్తైన నిర్మాణాలు ఉండటంతో సహాయక చర్యలు చేపట్టడం కష్టంగా మారింది. శిథిలాలను తొలగించేందుకు భారీ యంత్రాలను తీసుకురావడంలోనూ ఇబ్బందులు ఎదురైనట్లు సమాచారం. తొలుత సిబ్బంది అందుబాటులో ఉన్న పరికరాలతో గాలింపు చేపట్టగా, అనంతరం ఎక్స్కవేటర్ల సాయంతో శిథిలాలను తొలగించే పనులు ప్రారంభించారు.