దేశీయంగా తయారీ రంగం (మాన్యుఫాక్చరింగ్) వృద్ధి అక్టోబర్లో స్వల్పంగా మందగించింది. దేశీయ డిమాండ్ తగ్గడం, కొత్త ఆర్డర్ల వృద్ధి నెమ్మదించడం, ఉద్యోగ నియామకాల్లో వేగం తగ్గడం వంటి కారణాలతో ఈ పరిస్థితి నెలకొంది. అయితే, అంతర్జాతీయ మార్కెట్ల నుంచి వచ్చిన ఆర్డర్లు తయారీ రంగానికి కొంత ఊరటనిచ్చాయి.
ముఖ్యంగా ఎగుమతి ఆర్డర్లు గత ఆరు నెలల్లో ఎన్నడూ లేనంత వేగంగా పెరిగాయి. హెచ్ఎస్బీసీ ఇండియా తయారీ రంగ కొనుగోలు నిర్వాహకుల సూచీ (పీఎంఐ) సెప్టెంబర్లో 55.1గా ఉండగా, అక్టోబర్లో 54.7కు తగ్గింది. సోమవారం విడుదలైన గణాంకాలు ఈ విషయాన్ని వెల్లడించాయి. పీఎంఐ సూచీ 50 పాయింట్లకు పైన ఉండటం గమనార్హం. 50 కంటే ఎక్కువగా ఉంటే రంగం వృద్ధి బాటలో ఉన్నట్లు, అంతకంటే తక్కువగా ఉంటే క్షీణతలో ఉన్నట్లు పరిగణిస్తారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ లెక్కన తయారీ రంగంలో వృద్ధి కొనసాగుతున్నప్పటికీ, గత నెలతో పోలిస్తే వేగం తగ్గింది. దేశీయ మార్కెట్లో డిమాండ్ కొంత మందగించినప్పటికీ, విదేశీ మార్కెట్ల నుంచి వచ్చిన ఆర్డర్లు తయారీ సంస్థలకు ఊతమిచ్చాయి. అక్టోబర్లో కొత్త ఎగుమతి ఆర్డర్లు గత ఆరు నెలల్లో అత్యంత వేగంగా పెరిగాయి. అమెరికా, బ్రిటన్, యూఏఈ, సౌదీ అరేబియా, బంగ్లాదేశ్, కెనడా, ఇండోనేషియా వంటి దేశాల నుంచి భారత కంపెనీలకు ఆర్డర్లు వచ్చాయి.
కొత్త వినియోగదారులను ఆకర్షించడం, మార్కెటింగ్ కార్యక్రమాలు, అంతర్జాతీయ మార్కెట్లలో అనుకూల డిమాండ్ వంటివి ఇందుకు దోహదపడ్డాయి. దీంతో ఫ్యాక్టరీల ఉత్పత్తి పెరిగినప్పటికీ, సెప్టెంబర్తో పోలిస్తే వృద్ధి వేగం తగ్గింది. తయారీ రంగంలో మరో సానుకూల పరిణామం ద్రవ్యోల్బణ ఒత్తిడి తగ్గడం. ముడి పదార్థాలు, ఇంధన ధరల్లో కొన్ని పెరుగుదలలు నమోదైనప్పటికీ, మొత్తం ఉత్పత్తి వ్యయాల పెరుగుదల ఫిబ్రవరి తర్వాత కనిష్ఠ స్థాయికి చేరింది.