శ్రీ హనుమ జీవితం నుండి మనం ఎన్నో విలువైన పాఠాలు నేర్చుకోవచ్చు. ధర్మం, స్నేహం, అహంకారం, విశ్వాసం వంటి అంశాలపై హనుమ బోధనలు నేటికీ ఆదర్శంగా నిలుస్తున్నాయి. రావణుడు, వాలి వంటి పాత్రలతో పోల్చి చూస్తే, హనుమ జీవితం సరైన మార్గాన్ని ఎంచుకోవడం, అంకితభావంతో పనిచేయడం యొక్క ప్రాముఖ్యతను తెలియజేస్తుంది.
ఎవరిని, దేనిని ఆశ్రయించాలో తెలుసుకోవడం జీవితంలో చాలా ముఖ్యం. ధర్మం తెలిసిన బ్రాహ్మణుడైన రావణుడు, అపారమైన శివ భక్తుడైనప్పటికీ, పరస్త్రీల యందు, పరుల సొమ్ము నందు వాంఛను చంపుకోలేకపోయాడు. చివరకు శ్రీ రాముని ఒక్క బాణంతో పది తలలు కూలి మట్టిలో కలిసిపోయాడు. ధర్మమూర్తి అయిన శ్రీ రాముని పాదాలను పట్టి ఆశ్రయించి, ఆయన మార్గంలో నడిచిన స్వామి హనుమ చిరంజీవిగా, చరిత్రలో నిలిచిపోయారు. జీవితంలో ఏదైనా సాధించాలనుకున్నప్పుడు దేన్ని పట్టుకోవాలో, దేన్ని విడిచిపెట్టాలో తెలియాలి. సరైన మార్గాన్ని తెలుసుకోవడమే కాదు, దానిని పాటించే ధైర్యం కూడా ఉండాలి.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
మైత్రి విలువను కూడా హనుమ జీవితం తెలియజేస్తుంది. వంచనతో, బలంతో భార్యను, భూమిని, బలగాన్ని తనవైపు తిప్పుకున్న వాలికి హనుమ మంత్రిగా ఒక్కనాడూ లేరు. తన దారి తానూ చూసుకోలేదు. న్యాయం వైపుగా సుగ్రీవుడి పక్షాన్నే నిలిచి ఉన్నారు. జీవితంలో కష్టాలు, సుఖాలు రెండూ పంచుకునే మంచి మిత్రులు దొరకడం చాలా కష్టం. నిజంగా అలాంటి వాళ్ళు దొరికినప్పుడు, వాళ్ళని ఎన్ని కష్టాలొచ్చినా విడిచిపెట్టకూడదు.
అహంకారం వీడాలి
నేనే గొప్ప అని అనుకోకూడదు. నాదేం లేదు అనగలిగే గొప్ప స్వభావం కలిగి ఉండాలి. లంకకు వెళ్ళే ముందు హనుమ ఇలా అంటారు: నేను తలచుకుంటే నా శరీరాన్ని అమాంతం పెంచి, వంగి ఒక్క చేత్తో అవతలి లంకా తీరాన్ని అందుకోగలను. అంత బలం ఉంది. కాని నేను ఎలా వెళ్తానో తెలుసా నా స్వామి రామచంద్రమూర్తి తన కుడిచేత్తో, భుజం వెనుకనున్న అక్షయ బాణ తూణీరం నుండి తీసిన బాణాన్ని ఎడమ చేతిలోనున్న బంగారు వింటినారికి సంధించి, ఆకర్ణాంతం లాగి విడిచిపెడితే ఆ బాణం ఎలా వెళుతుందో, అలా దూసుకెళ్తాను. అది నా శక్తి కాదు. రాముడి చే విడవబడితే, రాముడి శక్తి ఆ బాణంలోకి వెళ్లి బాణం వెళుతుంది. అటువంటి రామ బాణంలా వెళ్తాను - నేను, నా వల్ల, నా బలం.. ఇదంతా నేనే చేశాను.. అని హనుమ ఒక్కసారి కూడా అనలేదు.