నేపాల్లోని గోరఖా జిల్లాలో మనాకమన ఆలయం నుండి తిరిగి వస్తున్న భారతీయ యాత్రికులతో ప్రయాణిస్తున్న మైక్రోబస్ అదుపుతప్పి లోయలో పడిపోవడంతో ఏడుగురు మృతి చెందారు. ఈ ఘటనలో పలువురు గాయపడ్డారు.
గోరఖా జిల్లాలోని షాహిద్ లఖన్ గ్రామీణ మునిసిపాలిటీ పరిధిలోని కంతార్ వద్ద ఈ ప్రమాదం జరిగింది. ఎలక్ట్రిక్ మైక్రోబస్లో మొత్తం 16 మంది ప్రయాణిస్తున్నట్లు పోలీసులు తెలిపారు. వీరిలో 14 మంది భారతీయ యాత్రికులు ఉన్నారు.
ప్రమాదానికి గురైన వాహనం సుమారు 200 మీటర్ల లోతులో ఉన్న లోయలోకి దూసుకుపోయింది. ఈ దుర్ఘటనలో ఏడుగురు భారతీయ యాత్రికులు అక్కడికక్కడే ప్రాణాలు కోల్పోయారు. మృతులలో ఇద్దరు మహిళలు, ఐదుగురు పురుషులు ఉన్నారని అధికారులు ధృవీకరించారు.
