ఇంటర్నెట్ ద్వారా టీవీ ఛానళ్లను ప్రసారం చేసే యాప్ల కోసం భారత టెలికాం నియంత్రణ సంస్థ (ట్రాయ్) కీలక ప్రతిపాదనలు చేసింది. ఉచితంగా ప్రకటనలతో టీవీ కార్యక్రమాలను అందించే ఫాస్ట్ () సేవలతో పాటు, యాప్లు, వెబ్సైట్ల ద్వారా ప్రత్యక్ష టీవీ ఛానళ్లను ప్రసారం చేసే వేదికలకు ప్రత్యేక అనుమతి విధానాన్ని తీసుకురావాలని సూచించింది. ఈ ప్రతిపాదనల ప్రధాన లక్ష్యం డిజిటల్ టీవీ సేవలకు స్పష్టమైన నియంత్రణ వ్యవస్థను ఏర్పాటు చేయడం.
ట్రాయ్ ప్రతిపాదనల ప్రకారం, ఇంటర్నెట్ ఆధారిత టీవీ ప్రసార సేవలను అందించే సంస్థలు కేంద్ర ప్రభుత్వం నుంచి అనుమతి పొందాల్సి ఉంటుంది. ఇందుకోసం దరఖాస్తు ప్రాసెసింగ్ ఫీజుగా రూ.10,000, ఒకేసారి ప్రవేశ రుసుముగా రూ.1 లక్ష చెల్లించాలని సూచించింది. ప్రతిపాదిత అనుమతి ప్రారంభంగా 20 సంవత్సరాల పాటు చెల్లుబాటు అవుతుంది. ఆ తర్వాత ప్రతి పదేళ్లకు ఒకసారి పునరుద్ధరించుకునే అవకాశం ఉంటుంది. ఈ సేవలకు వార్షిక అనుమతి రుసుము, బ్యాంకు గ్యారంటీ లేదా భద్రతా డిపాజిట్ అవసరం లేదని ట్రాయ్ పేర్కొంది. అయితే ఇవి ప్రస్తుతం ప్రతిపాదనలే; తుది నిబంధనలు కేంద్ర ప్రభుత్వం నోటిఫై చేసిన తర్వాతే అమల్లోకి వస్తాయి.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
స్మార్ట్ టీవీల్లోనూ కొత్త మార్పులు
ప్రతిపాదిత విధానం ప్రకారం, కేంద్ర ప్రభుత్వం అనుమతించిన టీవీ ఛానళ్లను మాత్రమే సంబంధిత యాప్ల ద్వారా ప్రసారం చేయాలి. ఇంటర్నెట్లోనే ప్రసారమయ్యే కొత్త టీవీ ఛానళ్ల కోసం సరళమైన నమోదు విధానాన్ని కూడా ట్రాయ్ సూచించింది. స్మార్ట్ టీవీల తయారీ సంస్థలు, ఆపరేటింగ్ సిస్టమ్లను అందించే సంస్థలు తమ పరికరాలు, యాప్ స్టోర్లలో అనుమతి పొందిన యాప్లకే అవకాశం కల్పించేలా చర్యలు తీసుకోవాలని ప్రతిపాదించింది. ఇందుకోసం సమాచార, ప్రసార మంత్రిత్వ శాఖ ప్రత్యేకంగా అనుమతి పొందిన యాప్ల జాబితాను నిర్వహించాలని సూచించింది. సంబంధిత సంస్థలు ప్రభుత్వానికి వార్షిక అనుసరణ నివేదికలు సమర్పించాల్సి ఉంటుంది.
