రెండు దశాబ్దాల క్రితం తెలుగు చిత్ర పరిశ్రమలో తీవ్ర కలకలం రేపిన నటి ప్రత్యూష మరణం కేసులో సుప్రీంకోర్టు కీలక తీర్పు వెలువరించింది. ఈ కేసులో నిందితుడిగా ఉన్న సిద్ధార్థ రెడ్డి దాఖలు చేసిన పిటిషన్ను అత్యున్నత న్యాయస్థానం కొట్టివేస్తూ, గతంలో హైకోర్టు విధించిన శిక్షను సమర్థించింది. సిద్ధార్థ రెడ్డిని వచ్చే నాలుగు వారాల్లోగా పోలీసులకు లొంగిపోవాలని సుప్రీంకోర్టు ఆదేశించింది.
ప్రత్యూష, 1998లో 'రాయుడు' సినిమాతో సినీ రంగ ప్రవేశం చేసి, 'స్నేహం అంటే ఇదేరా', 'కలుసుకోవాలని' వంటి విజయవంతమైన చిత్రాలలో నటించి, తక్కువ కాలంలోనే ప్రేక్షకుల మన్ననలు పొందారు. ఆమె కెరీర్ అత్యున్నత దశలో ఉన్నప్పుడు, 2002 ఫిబ్రవరి 23న, తన ప్రియుడు సిద్ధార్థ రెడ్డితో కలిసి ఆత్మహత్యాయత్నం చేసుకున్నట్లు వార్తలు వెలువడ్డాయి. పెళ్లికి పెద్దలు అంగీకరించలేదనే కారణంతో పురుగుల మందు సేవించినట్లు అప్పట్లో ప్రచారం జరిగింది. చికిత్స పొందుతూ ప్రత్యూష మరణించగా, సిద్ధార్థ రెడ్డి మాత్రం ప్రాణాలతో బయటపడ్డారు.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
అయితే, ఈ సంఘటన ఆత్మహత్య కాదని, ఇది హత్య అని ప్రత్యూష తల్లి సరోజిని దేవి తీవ్రంగా ఆరోపించారు. అప్పటి నుంచి ఆమె తన కుమార్తె మరణానికి న్యాయం చేయాలంటూ సుదీర్ఘ న్యాయ పోరాటం ప్రారంభించారు. దాదాపు 24 ఏళ్లుగా కోర్టుల చుట్టూ తిరుగుతూ, ఈ కేసులో న్యాయం కోసం పోరాడారు.
