పెట్రోల్లో ఇథనాల్ కలిపే అంశంపై కేంద్ర ప్రభుత్వాన్ని కాంగ్రెస్ అగ్రనేత రాహుల్ గాంధీ ప్రశ్నించారు. కర్ణాటకలో సేకరించిన పెట్రోల్ నమూనాల్లో 20 శాతం పరిమితికి మించి ఇథనాల్ ఉన్నట్లు తేలిందని ఆయన ఆరోపించారు. అయితే, ఈ ఆరోపణలను ప్రభుత్వ రంగ చమురు సంస్థలు ఖండించాయి.
లోక్సభలో ప్రతిపక్ష నేత, కాంగ్రెస్ అగ్రనేత రాహుల్ గాంధీ పెట్రోల్లో ఇథనాల్ కలిపే అంశంపై కేంద్రంలోని నరేంద్ర మోదీ ప్రభుత్వాన్ని ప్రశ్నించారు. పెట్రోల్లో 20 శాతం ఇథనాల్ ఉంటుందని కేంద్రం చెబుతున్నప్పటికీ, కర్ణాటక ప్రభుత్వం జిల్లాల్లో సేకరించిన నమూనాలను ప్రయోగశాలల్లో పరీక్షించగా, 14 నమూనాల్లో 11 నమూనాల్లో ఇథనాల్ శాతం 20 శాతానికి మించినట్లు తేలిందని రాహుల్ గాంధీ వెల్లడించారు. ఇండియన్ ఆయిల్ కార్పొరేషన్ పెట్రోల్ నమూనాలో 31.2 శాతం, హిందుస్థాన్ పెట్రోలియం నమూనాలో 30.5 శాతం ఇథనాల్ ఉన్నట్లు పరీక్షల్లో వెల్లడైందని ఆయన పేర్కొన్నారు. ఇండియన్ ఆయిల్, హెచ్పీసీఎల్, బీపీసీఎల్తో పాటు నయారా, షెల్ వంటి ప్రైవేటు సంస్థల పెట్రోల్లోనూ పరిమితికి మించి ఇథనాల్ ఉన్నట్లు ఆరోపించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ అంశంపై సామాజిక మాధ్యమం ఎక్స్లో స్పందించిన రాహుల్ గాంధీ, ఈ20 కాస్తా 420గా మారింది. ప్రజల వాహనాల నుంచి పెట్రోల్ దొంగతనం జరుగుతోంది అంటూ కేంద్ర ప్రభుత్వంపై విమర్శలు చేశారు. పెట్రోల్లో అధికంగా ఇథనాల్ కలపడం వల్ల వాహనాల మైలేజీ తగ్గుతుందని, నిర్వహణ ఖర్చులు పెరుగుతాయని, ఇంజిన్ పనితీరుపై ప్రభావం పడే అవకాశం ఉందని ఆయన ఆరోపించారు. పెట్రోల్ బంకుల్లో ఇంధనంలో ఎంత శాతం ఇథనాల్ ఉందో వినియోగదారులకు తెలియజేసే సమాచారం ఎందుకు అందుబాటులో లేదని ఆయన ప్రశ్నించారు. వాహనదారులు తమకు కావాల్సిన ఇంధనాన్ని ఎంచుకునే అవకాశం కూడా లేదని పేర్కొన్నారు.
