ఆగ్నేయ బంగాళాఖాతంలో అల్పపీడనం: మత్స్యకారులకు వాతావరణ శాఖ హెచ్చరిక

వై.ఎస్.ఆర్ కడప, 10 November

ఆగ్నేయ బంగాళాఖాతంలో ఈ నెల 13న అల్పపీడనం ఏర్పడనుందని వాతావరణ శాఖ తెలిపింది. ఇది 24 గంటల్లో బలపడే అవకాశం ఉందని అధికారులు వెల్లడించారు.

దీని ప్రభావంతో అండమాన్ సముద్రం, ఆగ్నేయ బంగాళాఖాతంలో గంటకు 40-50 కిలోమీటర్ల వేగంతో ఈదురుగాలులు వీస్తాయని హెచ్చరించారు. సముద్రంలో అలల ఉద్ధృతి కూడా ఎక్కువగా ఉంటుందని తెలిపారు.

ఈ నేపథ్యంలో ఈ నెల 14, 15 తేదీల్లో మత్స్యకారులు ఎవరూ వేటకు వెళ్లవద్దని అధికారులు స్పష్టం చేశారు. ఇప్పటికే సముద్రంలో ఉన్న మత్స్యకారులు వెంటనే తీరానికి చేరుకోవాలని సూచించారు.