కుక్క అడ్డురావడంతో విద్యార్థినికి తీవ్ర గాయాలు, ఆసుపత్రికి తరలింపు

మండలంలో జాతీయ రహదారిపై వీధి కుక్క అడ్డురావడంతో ద్విచక్ర వాహనం అదుపుతప్పి బోల్తా పడింది. ఈ ఘటనలో లినోరా అనే విద్యార్థినికి తల, కాళ్లు, చేతులకు తీవ్ర గాయాలయ్యాయి. బాధితురాలిని చికిత్స నిమిత్తం మదనపల్లె జిల్లా ప్రభుత్వ ఆసుపత్రికి తరలించారు.

కుటుంబ సభ్యులు తెలిపిన వివరాల ప్రకారం, మదనపల్లె టౌన్ నిమ్మనపల్లి క్రాస్ రోడ్డులో నివాసం ఉంటున్న దివంగత సురేష్ కుమార్ కుమార్తె లినోరా (22) గురువారం తన ద్విచక్ర వాహనంపై కలికిరి వైపు వెళుతుండగా, మార్గమధ్యంలోని చింతపర్తి బ్రిడ్జి వద్ద ఒక్కసారిగా వీధి కుక్క రోడ్డుకు అడ్డంగా వచ్చింది.

దీంతో కుక్కను తప్పించబోయే క్రమంలో బైక్ అదుపుతప్పి రోడ్డుపై బోల్తా పడింది. ఈ ప్రమాదంలో లినోరా రోడ్డుపై పడటంతో తల, కాళ్లు, చేతులకు తీవ్ర గాయాలయ్యాయి. హెల్మెట్ ధరించకపోవడం వల్ల గాయాల తీవ్రత ఎక్కువగా ఉన్నట్లు తెలుస్తోంది.