కామారెడ్డిలో భారీ వర్షాలు: వరదల్లో చిక్కుకున్న పెళ్లి బస్సు నుండి 45 మందిని కాపాడిన పోలీసులు

ప్రజలకు ఎస్పీ సూచనలు

ప్రజల ప్రాణ రక్షణే తమ తొలి ప్రాధాన్యత అని ఎస్పీ స్పష్టం చేశారు. వాగులు, కల్వర్టులు, చెరువులు, వరద ప్రవాహ ప్రాంతాల వద్దకు ఎట్టి పరిస్థితుల్లోనూ వెళ్లవద్దని, సెల్ఫీలు, వీడియోల కోసం ప్రాణాలను ప్రమాదంలోకి నెట్టుకోవద్దని హెచ్చరించారు. చిన్నారులపై తల్లిదండ్రులు ప్రత్యేక నిఘా ఉంచాలని, అత్యవసరమైతే తప్ప ఇళ్ల నుంచి బయటకు రావద్దని సూచించారు.

బందోబస్తు పెంపుపై ఆదేశాలు

జిల్లాలోని వరద ప్రభావిత ప్రాంతాలు, చెరువులు, రద్దీ కూడళ్ల వద్ద పోలీసు బందోబస్తును మరింత బలోపేతం చేయాలని అధికారులను ఆదేశించిన ఎస్పీ, అన్ని పోలీసు అధికారులు క్షేత్రస్థాయిలోనే అందుబాటులో ఉంటూ పరిస్థితిని నిరంతరం పర్యవేక్షించాలని సూచించారు.

వరదలో చిక్కుకున్న బస్సు యాత్ర

ఇదిలా ఉండగా, సోమవారం రాత్రి కామారెడ్డి పట్టణంలోని సుభాష్ రోడ్ చౌరస్తా వద్ద వరద నీటిలో చిక్కుకున్న పెళ్లి బస్సులోని 45 మంది ప్రయాణికులను పోలీసులు, అగ్నిమాపక శాఖ సిబ్బంది సమన్వయంతో సురక్షితంగా బయటకు తరలించారు. అనంతరం ప్రత్యామ్నాయ బస్సును ఏర్పాటు చేసి వారి ప్రయాణం కొనసాగేందుకు చర్యలు చేపట్టారు.

సిబ్బందిని అభినందించిన ఎస్పీ

ఈ సహాయక చర్యల్లో వర్షాన్ని సైతం లెక్కచేయకుండా విధులు నిర్వర్తించిన పోలీసు, అగ్నిమాపక శాఖ సిబ్బందిని జిల్లా ఎస్పీ ప్రత్యేకంగా అభినందించారు. భారీ వర్షాలు కొనసాగుతున్న నేపథ్యంలో అత్యవసర పరిస్థితుల్లో వెంటనే సమీప పోలీస్ స్టేషన్ లేదా డయల్-100 సేవలను సంప్రదించాలని ప్రజలకు విజ్ఞప్తి చేశారు.

పర్యటనలో పాల్గొన్న అధికారులు

ఈ పర్యటనలో కామారెడ్డి డీఎస్పీ మధుసూదన్, టౌన్ సీఐ నరహరి, రూరల్ సీఐ శ్రీధర్, దేవునిపల్లి ఎస్ఐ రంజిత్, ట్రాఫిక్ ఎస్ఐ చంద్రశేఖర్ గౌడ్ తదితరులు పాల్గొన్నారు.