తిరుమల పుణ్యక్షేత్రంలో శ్రీవారి దర్శనం కోసం వేచి ఉన్న భక్తులలో ఆందోళన కలిగించిన సంఘటన చోటుచేసుకుంది. క్యూలైన్లో నిలబడి ఉన్న ఒక భక్తురాలిని పాము కాటేయడంతో కలకలం రేగింది. అయితే, టీటీడీ సిబ్బంది సత్వర స్పందనతో ప్రాణాపాయం తప్పింది.
తెలంగాణలోని భూపాలపల్లి జిల్లాకు చెందిన మౌనిక (27) అనే భక్తురాలు 300 రూపాయల ప్రత్యేక ప్రవేశ దర్శనం క్యూలైన్లో నిలబడి ఉండగా, అకస్మాత్తుగా ఒక పాము ఆమెను కాటేసింది. క్యూలైన్ల మధ్యలో పాము కనిపించడంతో తోటి భక్తులు భయాందోళనకు గురయ్యారు.
వెంటనే అప్రమత్తమైన టీటీడీ సిబ్బంది, బాధితురాలిని ఆలస్యం చేయకుండా తిరుమలలోని అశ్విని ఆస్పత్రికి తరలించి ప్రాథమిక చికిత్స అందించారు. పాముకాటు తీవ్రతను పరిగణనలోకి తీసుకుని, మెరుగైన వైద్యం కోసం ఆమెను తిరుపతిలోని స్విమ్స్ (SVIMS) ఆస్పత్రికి తరలించారు.
స్విమ్స్ వైద్యులు మౌనికకు అత్యవసర చికిత్స అందించి, నిరంతరం పర్యవేక్షించారు. సకాలంలో వైద్యం అందడంతో ఆమె ప్రాణాపాయం నుండి బయటపడ్డారు. ఆమె సంపూర్ణంగా కోలుకున్నారని టీటీడీ అధికారులు ధృవీకరించారు. చికిత్స అనంతరం ఆమె తన స్వస్థలమైన భూపాలపల్లికి చేరుకున్నారు.
తిరుమల శేషాచలం అడవుల పరిధిలో ఉండటం వల్ల అప్పుడప్పుడు వన్యప్రాణులు క్యూలైన్లలోకి వచ్చే అవకాశం ఉందని, భక్తులు అప్రమత్తంగా ఉండాలని అధికారులు సూచించారు. టీటీడీ సిబ్బంది క్యూలైన్ల పరిశుభ్రతను నిరంతరం పర్యవేక్షిస్తున్నట్లు తెలిపారు.