ఉత్తరప్రదేశ్లోని మథుర జిల్లాలో అహోయి అష్టమి సందర్భంగా భక్తి సందడి నెలకొంది. గోవర్ధన్లోని రాధాకుండ్, శ్యామ్కుండ్ వద్ద పవిత్ర స్నానాలు ఆచరించేందుకు దేశంలోని వివిధ ప్రాంతాల నుంచి వేలాది మంది భక్తులు తరలివచ్చారు. ముఖ్యంగా సంతానం లేని దంపతులు సంతాన భాగ్యం కలగాలని రాధారాణిని ప్రార్థిస్తూ అర్ధరాత్రి పవిత్ర స్నానాలు ఆచరించారు.
అహోయి అష్టమి సందర్భంగా నవంబర్ 1వ తేదీ అర్ధరాత్రి నుంచి రాధాకుండ్లో పవిత్ర స్నానాలు ప్రారంభమయ్యాయి. ఈ సందర్భంగా రాధాకుండ్, శ్యామ్కుండ్ పరిసరాలు భక్తులతో కిక్కిరిసిపోయాయి. దంపతులు కలిసి పవిత్ర జలాల్లో స్నానాలు ఆచరించి సంతానం కలగాలని ప్రార్థించారు. ఇప్పటికే సంతానం పొందిన దంపతులు తమ మొక్కులు చెల్లించుకునేందుకు కూడా అక్కడికి చేరుకున్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
సంతాన భాగ్యం కోసం ప్రత్యేక పూజలు
అహోయి అష్టమి రోజున రాధాకుండ్లో దంపతులు కలిసి స్నానం చేస్తే రాధారాణి అనుగ్రహంతో సంతాన భాగ్యం కలుగుతుందనే విశ్వాసం ఉంది. ఈ నమ్మకంతో దేశంలోని వివిధ ప్రాంతాలతో పాటు విదేశాల నుంచి కూడా దంపతులు ఇక్కడికి వస్తుంటారు. స్నానం అనంతరం రాధారాణికి పూజలు చేసి, కుండం చుట్టూ ప్రదక్షిణలు నిర్వహిస్తారు. తమ కోరికలు నెరవేరిన వారు కృతజ్ఞతలు తెలుపుతూ ప్రత్యేక పూజలు చేస్తారు.
