ప్రపంచ స్థాయి డేటా సెంటర్ల ఏర్పాటుకు భారత్ అనుకూలమైన గమ్యస్థానమని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ అమెరికా పెట్టుబడిదారులకు పిలుపునిచ్చారు. అమెరికాలోని చికాగోలో భారతీయ అమెరికన్లతో జరిగిన సమావేశంలో ఆయన మాట్లాడుతూ, డేటా సెంటర్లు, కృత్రిమ మేధస్సు, డిజిటల్ మౌలిక వసతుల రంగాల్లో భారత్లో పెట్టుబడులకు విస్తృత అవకాశాలున్నాయని తెలిపారు.
భారత్లో తక్కువ వ్యయంతో లభించే స్వచ్ఛ ఇంధనం, దేశవ్యాప్తంగా అనుసంధానమైన విద్యుత్ గ్రిడ్, తక్కువ డేటా-మౌలిక వసతుల వ్యయాలు, విస్తృత సాంకేతిక నైపుణ్యాలున్న మానవ వనరులు ఉన్నాయని గోయల్ పేర్కొన్నారు. భౌగోళిక, ఆర్థిక పరిస్థితులను దృష్టిలో ఉంచుకుని డేటా భద్రతతో పాటు పెట్టుబడులకు విశ్వసనీయ వాతావరణం కల్పించడంలో భారత్కు అవకాశాలున్నాయని ఆయన వివరించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
భారత్లో ప్రస్తుతం సుమారు 520 గిగావాట్ల సామర్థ్యంతో జాతీయ విద్యుత్ గ్రిడ్ ఉందని, రాబోయే ఆరు నుంచి ఏడు సంవత్సరాల్లో దాని సామర్థ్యాన్ని 1,000 గిగావాట్లకు పెంచే లక్ష్యం ఉందని గోయల్ తెలిపారు. ప్రస్తుతం ఈ గ్రిడ్లో స్థాపిత సామర్థ్యంలో సుమారు 60 శాతం స్వచ్ఛ ఇంధన వనరులైన సౌర, పవన, జల, అణు విద్యుత్ నుంచి వస్తోందని ఆయన చెప్పారు. 2033 నాటికి ఈ వాటా 70 శాతానికి చేరుతుందని ఆయన అంచనా వ్యక్తం చేశారు.
