ఓటర్ల జాబితా సవరణ పారదర్శకంగా జరగాలి: రాష్ట్ర ఎన్నికల అధికారి

ఈ సందర్భంగా సుదర్శన్ రెడ్డి మాట్లాడుతూ, ఏఎస్డీ (గైర్హాజరు, చిరునామా మార్పు, మరణించిన ఓటర్లు) జాబితాలోని వివరాలను క్షేత్రస్థాయిలో క్షుణ్ణంగా పరిశీలించి, తగిన ఆధారాలతో ధ్రువీకరించాలని సూచించారు. సరైన విచారణ, ఆధారాలు లేకుండా అర్హులైన ఓటర్ల పేర్లను తొలగించకూడదని స్పష్టం చేశారు.

డిలీషన్ జాబితాలోని ప్రతి ఓటరు వివరాలను ఎన్నికల నిబంధనల ప్రకారం పరిశీలించాలని, పేరు తొలగింపునకు గల కారణాలు, ఆధారాలను నమోదు చేయాలని తెలిపారు. ఓటర్లు సమర్పించే అభ్యంతరాలు, వివరణలు, పత్రాలను పరిగణనలోకి తీసుకొని నిర్ణయాలు తీసుకోవాలని ఆయన అన్నారు.

దరఖాస్తుల సత్వర పరిష్కారం తప్పనిసరి

ఫారం-6 ద్వారా కొత్త ఓటరు నమోదు, ఫారం-7 ద్వారా అభ్యంతరాలు, పేర్ల తొలగింపు, ఫారం-8 ద్వారా చిరునామా మార్పులు, ఓటరు వివరాల సవరణలకు సంబంధించిన దరఖాస్తులను నిర్ణీత గడువులోగా పరిష్కరించాలని ఆదేశించారు. ఎలాంటి దరఖాస్తులు పెండింగ్లో ఉండకుండా నిరంతరం పర్యవేక్షించాలని ఆయన సూచించారు.

ఓటర్ల జాబితాలో చేర్పులు, తొలగింపులు, మార్పులకు సంబంధించి ప్రతి నిర్ణయానికి స్పష్టమైన కారణాలు పేర్కొంటూ స్పీకింగ్ ఆర్డర్లు జారీ చేయాలని ఆయన సూచించారు. నోటీసులు, విచారణ నివేదికలు, ఓటర్లు సమర్పించిన ఆధారాలు, ఇతర సంబంధిత పత్రాలను క్రమపద్ధతిలో భద్రపరచాలని ఆయన తెలిపారు. నోటీసులు అందుకున్న ప్రతి ఓటరుకు తమ వాదనలు వినిపించేందుకు తగిన అవకాశం కల్పించాలని ఆయన స్పష్టం చేశారు.

సవరించిన షెడ్యూల్ ప్రకారం గడువులోగా పూర్తి చేయాలి

భారత ఎన్నికల సంఘం ప్రకటించిన సవరించిన షెడ్యూల్ ప్రకారం, నోటీసుల జారీ, విచారణలు, క్లెయిమ్స్, అభ్యంతరాల పరిష్కార ప్రక్రియను నిర్ణీత గడువులోగా పూర్తి చేయాలని ఆయన తెలిపారు. తుది ఓటర్ల జాబితా ప్రచురించాల్సి ఉన్నందున, నిర్ణీత గడువులను దృష్టిలో ఉంచుకొని అధికారులు సమన్వయంతో పనిచేయాలని ఆయన ఆదేశించారు.

ఈ వీడియో కాన్ఫరెన్స్లో ఎన్నికల సూపరింటెండెంట్ రంగ ప్రసాద్, ఎన్నికల సిబ్బంది నవీన్, సంబంధిత అధికారులు పాల్గొన్నారు.