దక్షిణ మధ్య రైల్వేలో కవచ్ 4.0 అప్గ్రేడేషన్: జీఎం సంజయ్ కుమార్ శ్రీవాస్తవ పరిశీలన

108 రూట్ కిలోమీటర్లలో అప్గ్రేడ్

దక్షిణ మధ్య రైల్వేలో తొలిసారిగా మల్కాజిగిరికామారెడ్డి మార్గంలో 108 రూట్ కిలోమీటర్ల మేర కవచ్ వెర్షన్ 3.2 నుంచి 4.0కి అప్గ్రేడ్ పనులు విజయవంతంగా పూర్తయ్యాయి. వివిధ సందర్భాల్లో కవచ్ 4.0లోని అంశాల పనితీరును జనరల్ మేనేజర్ పరిశీలించారు.

అధునాతన భద్రతా సాంకేతికత

కవచ్ 4.0లో మెరుగైన భద్రతా ప్రమాణాలు, అధునాతన సాంకేతికత, అధిక విశ్వసనీయత వంటి అంశాలను ప్రవేశపెట్టారు. పెరిగిన లొకేషన్ ఖచ్చితత్వం, పెద్ద యార్డుల్లో సిగ్నల్ అంశాలపై మెరుగైన సమాచారం, ఆప్టికల్ ఫైబర్ కేబుల్ ద్వారా స్టేషన్-టు-స్టేషన్ కవచ్ ఇంటర్ఫేస్, ఎలక్ట్రానిక్ ఇంటర్లాకింగ్ వ్యవస్థతో నేరుగా అనుసంధానం వంటి కీలక ఫీచర్లు ఇందులో ఉన్నాయి.

మానవ తప్పిదాలతో జరిగే ప్రమాదాల నివారణ

కవచ్ అదనపు భద్రతా వ్యవస్థగా పనిచేస్తుందని జీఎం సంజయ్ కుమార్ శ్రీవాస్తవ తెలిపారు. ప్రమాదకర పరిస్థితుల్లో సిగ్నల్ దాటడం, అధిక వేగంతో రైళ్లు నడపడం, ఢీకొనడం వంటి మానవ తప్పిదాల వల్ల కలిగే నష్టాలను తగ్గించడంతో పాటు, ప్రతికూల వాతావరణ పరిస్థితుల్లోనూ రైళ్ల నిర్వహణ భద్రతను పెంచుతుందని పేర్కొన్నారు. దక్షిణ మధ్య రైల్వేలోని ఇతర సెక్షన్లలోనూ కవచ్ అమలు ప్రక్రియ కొనసాగుతోందన్నారు.

అనంతరం జీఎం కామారెడ్డి, మేడ్చల్, మల్కాజిగిరి రైల్వే స్టేషన్లను తనిఖీ చేశారు. అమృత్ భారత్ స్టేషన్ పథకం కింద కొనసాగుతున్న పునరాభివృద్ధి పనుల పురోగతిని సమీక్షించారు. ప్రయాణికుల సౌకర్యాలు, స్టేషన్ ప్రాంగణాన్ని పరిశీలించి, భవిష్యత్ అవసరాలు, ప్రయాణికుల డిమాండ్లకు అనుగుణంగా చేపట్టాల్సిన అభివృద్ధి ప్రణాళికలపై అధికారులతో చర్చించారు.