ఐటీ ఉద్యోగాలు వదిలి వ్యవసాయం వైపు.. యువత అనుభవాలు పంచుకోవాలి

కొంతమంది యువత సోషల్ మీడియాలో పెట్టే పోస్టులు ఆశ్చర్యం కలిగిస్తున్నాయి. కొందరు లక్షల జీతం వచ్చే ఐటీ ఉద్యోగాలు వదిలి ఆటోలు నడుపుతూ ఆనందంగా జీవిస్తున్నామని, మరికొందరు అలాంటి ఉద్యోగాలే వదిలి డైరీ ఫామ్ లు, కోళ్ల ఫామ్ లు, ఆధునిక వ్యవసాయ పద్ధతులతో లక్షలు, కోట్లు సంపాదిస్తున్నామని పోస్టులు పెడుతున్నారు.

ఇది ఆనందాన్ని కలిగించినా, కొంత అనుమానాన్ని కూడా రేకెత్తిస్తోంది. నిజంగా ఐటీ ఉద్యోగాల కంటే వ్యవసాయంలోనే ఎక్కువ ఆదాయం వస్తుందా? ఒకవేళ అదే నిజమైతే, ఆ టెక్నిక్ లను తోటి రైతులతో పంచుకుంటే, ఆత్మహత్యలకు దారితీస్తున్న ప్రస్తుత పద్ధతులు వదిలి రైతులు మిమ్మల్నే అనుసరిస్తారు కదా అనిపిస్తోంది.

వ్యవసాయం చేసే యువకులను పెళ్లి చేసుకోవడానికి అమ్మాయిలు ముందుకు రావడం లేదని, అందుకే వారు 'ముదురు బెండకాయలు'గా మిగిలిపోతున్నారని ఆవేదన చెందుతున్న వారికి, మీ ఆధునిక వ్యవసాయ పద్ధతుల ద్వారా వచ్చే లక్షల ఆదాయం పెళ్లి భాగ్యాన్ని కూడా కలిగిస్తుందని భావిస్తున్నారు.

కాబట్టి, లక్షల జీతం వచ్చే ఐటీ ఉద్యోగాలను త్యాగం చేసి, ఇతర రంగాల్లో, ముఖ్యంగా వ్యవసాయ రంగంలో ఆదాయంతో పాటు ఆనందాన్ని పొందుతున్న వారందరూ తమ తమ అనుభవాలను సోషల్ మీడియా ద్వారా సవివరంగా పంచుకుంటే బాగుంటుందని అభిప్రాయం వ్యక్తమవుతోంది.