ప్రపంచవ్యాప్తంగా డిజిటల్ బంగారం మార్కెట్ వేగంగా విస్తరించే అవకాశాలు కనిపిస్తున్నాయి. 2031 నాటికి ఈ మార్కెట్ విలువ 160 నుంచి 170 బిలియన్ డాలర్లకు చేరవచ్చని వరల్డ్ గోల్డ్ కౌన్సిల్ (డబ్ల్యూజీసీ), బోస్టన్ కన్సల్టింగ్ గ్రూప్ (బీసీజీ) సంయుక్త నివేదిక అంచనా వేసింది. ప్రస్తుతం 45 నుంచి 55 బిలియన్ డాలర్లుగా ఉన్న ఈ మార్కెట్, వచ్చే ఐదేళ్లలో ఏటా సగటున 27 శాతం వృద్ధి సాధించవచ్చని పేర్కొంది.
అంతేకాకుండా, డిజిటల్ బంగారంలో పెట్టుబడులకు ఉన్న ప్రధాన అడ్డంకులను తొలగిస్తే, దీర్ఘకాలంలో మరో 700 బిలియన్ డాలర్ల మేర అదనపు డిమాండ్ ఏర్పడే అవకాశం ఉందని నివేదిక వెల్లడించింది. అయితే, ఇది తక్షణ మార్కెట్ వృద్ధిపై అంచనా కాదని, ప్రస్తుతం పూర్తిగా వినియోగంలోకి రాని పెట్టుబడి అవకాశాలకు సంబంధించిన అంచనా అని స్పష్టం చేసింది. డబ్ల్యూజీసీ, బీసీజీ సంస్థలు 12 దేశాల్లో 12,000 మందికి పైగా వ్యక్తిగత పెట్టుబడిదారుల అభిప్రాయాలను సేకరించాయి. ఈ అధ్యయనంలో దాదాపు పది మందిలో తొమ్మిది మంది, సరైన భద్రత, నమ్మకం, సౌకర్యాలు అందుబాటులో ఉంటే డిజిటల్ బంగారంలో పెట్టుబడులు పెట్టేందుకు ఆసక్తి చూపినట్లు వెల్లడైంది. ప్రస్తుతం భారత్లో 12 కోట్ల మందికి పైగా వినియోగదారులు డిజిటల్ బంగారం లావాదేవీల్లో పాల్గొన్నట్లు నివేదిక పేర్కొంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
డిజిటల్ బంగారం వినియోగం పెరగాలంటే కొన్ని కీలక సమస్యలను పరిష్కరించాల్సి ఉంటుందని నివేదిక సూచించింది. భద్రతపై నమ్మకం: పెట్టుబడి పెట్టే సంస్థ విశ్వసనీయతపై దాదాపు 80 శాతం మంది పెట్టుబడిదారులు ప్రాధాన్యం ఇస్తున్నారు. నియంత్రణ, రక్షణ: స్పష్టమైన నిబంధనలు, వినియోగదారులకు మెరుగైన రక్షణ కల్పించాలి. భౌతిక బంగారంగా మార్చుకునే అవకాశం: డిజిటల్ రూపంలో ఉన్న బంగారాన్ని అవసరమైనప్పుడు నిజమైన బంగారంగా పొందే సౌకర్యం ఉండాలి. సులభమైన కొనుగోలు: బ్యాంకింగ్ యాప్లు, చెల్లింపుల వేదికల ద్వారా పెట్టుబడులు పెట్టే అవకాశం విస్తరించాలి. పోటీ ధరలు: కొనుగోలు, విక్రయ సమయంలో ధరలు, రుసుముల విషయంలో పారదర్శకత అవసరం.
