డ్రైవర్ రహిత కార్ల సాంకేతికతను మరింత అభివృద్ధి చేసే దిశగా చైనాకు చెందిన ప్రముఖ టెక్నాలజీ సంస్థ బైదు కీలక ముందడుగు వేసింది. రోబోటాక్సీలకు శిక్షణ ఇచ్చేందుకు, వాస్తవ రహదారి పరిస్థితులను అనుకరించే సరికొత్త కృత్రిమ మేధ (ఏఐ) వ్యవస్థను ఆవిష్కరించింది. దీనికి అపోలో వరల్డ్ అని పేరు పెట్టింది.
ఈ వ్యవస్థ రోజుకు గరిష్ఠంగా లక్ష కిలోమీటర్ల మేర డ్రైవింగ్ పరిస్థితులను సిమ్యులేట్ చేయగలదని బైదు వెల్లడించింది. సాధారణ భద్రతా డ్రైవర్తో కూడిన వాహనం వాస్తవ ప్రపంచంలో సుమారు మూడేళ్ల పాటు ప్రయాణించిన దూరానికి ఇది సమానమని సంస్థ పేర్కొంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
రోబోటాక్సీలు రహదారులపై ఎదురయ్యే వివిధ పరిస్థితులను ఎలా ఎదుర్కోవాలో నేర్చుకునేందుకు ఈ సాంకేతికత ఉపయోగపడుతుంది. కెమెరాలు, లిడార్ సెన్సార్ల ద్వారా లభించే సమాచారాన్ని పోలిన డేటాను ఈ వ్యవస్థ సృష్టించగలదు. దీంతో డ్రైవర్ రహిత వాహనాలు రహదారులను గుర్తించడం, ఇతర వాహనాలను గమనించడం, ప్రమాదాలను అంచనా వేయడం వంటి అంశాల్లో శిక్షణ పొందగలవు.
