విశ్వబ్రాహ్మణులు అన్ని రంగాల్లో ముందుండాలి

సంఘం జిల్లా అధ్యక్షుడు దేమె రాజు చారి

గాంధారి: విశ్వబ్రాహ్మణులు అన్ని రంగాల్లో ముందుండేలా ఐక్యంగా కృషి చేయాలని విశ్వబ్రాహ్మణ సంఘం జిల్లా అధ్యక్షుడు దేమె రాజు చారి పిలుపునిచ్చారు. బుధవారం గాంధారి మండల కేంద్రంలోని హారాలే గార్డెన్స్‌లో నిర్వహించిన విశ్వబ్రాహ్మణ సంఘం విస్తృతస్థాయి సమావేశానికి ఆయన ముఖ్య అతిథిగా హాజరయ్యారు.

ఇటీవల నూతనంగా ఎన్నికైన జిల్లా స్థాయి సంఘం నాయకులతో దేమె రాజు చారి ప్రమాణ స్వీకారం చేయించారు. అంతకుముందు విశ్వబ్రాహ్మణ సంఘం జెండాను ఆవిష్కరించి, జ్యోతి ప్రజ్వలన చేశారు.

ఈ సందర్భంగా ఆయన మాట్లాడుతూ తెలంగాణ రాష్ట్రంలో విశ్వబ్రాహ్మణ కులస్తులు అనేక రంగాల్లో వెనుకబడి ఉన్నారని అన్నారు. విశ్వబ్రాహ్మణుల అభివృద్ధి కోసం ప్రభుత్వం ప్రత్యేక కార్పొరేషన్ ఏర్పాటు చేయాలని డిమాండ్ చేశారు. ఇతర కులాల వారు రాజకీయ, సామాజిక రంగాల్లో ముందుకు సాగుతుండగా, విశ్వబ్రాహ్మణులు మాత్రం ఆశించిన స్థాయిలో రాణించలేకపోతున్నారని పేర్కొన్నారు. ప్రభుత్వం ఈ పరిస్థితిని గుర్తించి విశ్వబ్రాహ్మణులకు తగిన ప్రోత్సాహం, అవకాశాలు కల్పించాలని కోరారు.

జిల్లాతో పాటు రాష్ట్రంలోని కొన్ని గ్రామాల్లో మాత్రమే విశ్వబ్రాహ్మణులు సర్పంచులు, వార్డు సభ్యులుగా ఎన్నికయ్యారని తెలిపారు. రాబోయే రోజుల్లో విశ్వబ్రాహ్మణులంతా ఐక్యంగా ఉండి తమ హక్కులు, సమస్యలు, డిమాండ్ల సాధన కోసం సమష్టిగా ముందుకు సాగాలని పిలుపునిచ్చారు.

కార్యక్రమంలో విశ్వబ్రాహ్మణ సంఘం రాష్ట్ర ఉపాధ్యక్షుడు వడ్ల భీమయ్య, జిల్లా ఉపాధ్యక్షుడు వడ్ల సిద్ధిరాములు, గాంధారి మండల అధ్యక్షుడు కమ్మరి సురేష్, ఎల్లారెడ్డి నియోజకవర్గ ప్రధాన కార్యదర్శి అవుసుల రాజు చారి, గాంధారి సంఘం అధ్యక్షుడు కమ్మరి పండరి, జిల్లా మాజీ అధ్యక్షుడు పుండరీ చారి పాల్గొన్నారు. మండలంలోని వివిధ గ్రామాల సంఘాల అధ్యక్షులు, ఉపాధ్యక్షులు, సభ్యులు పెద్ద సంఖ్యలో హాజరయ్యారు.