కడప జిల్లాలో జెడ్పీటీసీ, ఎంపీటీసీ ఎన్నికల పోలింగ్ ప్రశాంతం.. 71.78 ఓటింగ్ నమోదు

జిల్లాలోని 21 మండలాల పరిధిలో ఏర్పాటు చేసిన 599 పోలింగ్ కేంద్రాల్లో ఉదయం నిర్ణీత సమయానికి పోలింగ్ ప్రారంభమైందని, ఎలాంటి అవాంఛనీయ సంఘటనలు జరగకుండా పోలింగ్ ముగిసిందని ఆయన వివరించారు. ఎన్నికల సిబ్బంది, పోలీసు అధికారులు సమన్వయంతో విధులు నిర్వహించారని తెలిపారు.

జిల్లా వ్యాప్తంగా మొత్తం 4,56,650 మంది ఓటర్లకు గాను 3,27,781 మంది తమ ఓటు హక్కును వినియోగించుకున్నారని, దీంతో 71.78 శాతం పోలింగ్ నమోదైందని కలెక్టర్ వెల్లడించారు. ఇందులో 1,65,930 మంది పురుషులు, 1,61,851 మంది మహిళలు ఓటు వేశారని తెలిపారు.

జెడ్పీటీసీ ఎన్నికల్లో 16 స్థానాలకు సంబంధించి 4,32,523 మంది ఓటర్లలో 3,12,070 మంది ఓటు వేశారని, 72.15 శాతం పోలింగ్ నమోదైందని తెలిపారు. ఎంపీటీసీ ఎన్నికల్లో 55 స్థానాలకు సంబంధించి 3,00,611 మంది ఓటర్లలో 2,06,640 మంది ఓటు వేశారని, 68.74 శాతం పోలింగ్ నమోదైందని వివరించారు.

పోలింగ్ కేంద్రాల వద్ద పటిష్ట భద్రతా ఏర్పాట్లు చేశామని, సమస్యాత్మక ప్రాంతాల్లో ప్రత్యేక నిఘా ఉంచామని కలెక్టర్ చెప్పారు.

పోలింగ్ ముగిసిన అనంతరం బ్యాలెట్ పెట్టెలను పోలీసు భద్రత మధ్య నిర్దేశించిన స్వీకరణ కేంద్రాలకు తరలించి, స్ట్రాంగ్ రూమ్ లలో భద్రపరిచేందుకు ఏర్పాట్లు చేశామని తెలిపారు.

ఓటర్లు స్వేచ్ఛగా ఓటు హక్కు వినియోగించుకోవడానికి సహకరించిన అధికారులకు, సిబ్బందికి, పోలీసులకు కలెక్టర్ కృతజ్ఞతలు తెలిపారు.