పులిచర్ల, రొంపిచర్ల మండలాల్లో వైసీపీ ఐడీ కార్డుల పంపిణీ: ఎమ్మెల్యే పెద్దిరెడ్డి

ఈ సందర్భంగా పెద్దిరెడ్డి రామచంద్రారెడ్డి మాట్లాడుతూ, రాష్ట్ర వ్యాప్తంగా పార్టీ కోసం శ్రమించే వారికి పార్టీ పదవులు ఇచ్చామని తెలిపారు. వైఎస్ జగన్ మోహన్ రెడ్డి పార్టీ కార్యకర్తలు ప్రమాదవశాత్తు మరణిస్తే రూ.5 లక్షల ఆర్థిక సహాయం అందిస్తున్నారని తెలిపారు. అధికారంలో ఉన్నా లేకున్నా ప్రజల శ్రేయస్సు కోసమే జగన్ తపన పడుతున్నారని అన్నారు.

రాష్ట్రంలో రైతులు నీటి కొరతతో అనేక ఇబ్బందులు పడుతున్నారని, రాయలసీమ కరువుతో అల్లాడుతోందని ఆవేదన వ్యక్తం చేశారు. పోతిరెడ్డిపాడు ప్రాజెక్టును పూర్తి చేయకుండా అడ్డుకుంటామని చంద్రబాబు హామీ ఇచ్చారని, రేవంత్ రెడ్డి అసెంబ్లీ వేదికగా చెప్పారని విమర్శించారు.

ఎన్నికల హామీలను అమలు చేసి ఎన్నికలకు వెళ్లినా మనకు అనేక మంది మద్దతు లభించలేదని, మహిళలు, రైతులు చంద్రబాబు మాయమాటలు విని మోసపోయారని అన్నారు.

రానున్న ఎన్నికలపై దిశానిర్దేశం

రానున్న స్థానిక సంస్థల ఎన్నికల్లో, సాధారణ ఎన్నికల్లో కూడా మనమంతా వైఎస్ జగన్కు అండగా నిలవాలని పిలుపునిచ్చారు. స్థానిక సంస్థల ఎన్నికల్లో పోలీసుల బలంతో విజయం సాధించాలని కూటమి ప్రభుత్వం చూస్తోందని, ఈ పరిస్థితులను దీటుగా ఎదుర్కొని మనమంతా విజయం కోసం పోరాడాలని కార్యకర్తలకు దిశానిర్దేశం చేశారు.