త్వరలో నోటిఫికేషన్ వెలువడనున్న మున్సిపల్ ఎన్నికలను స్వేచ్ఛాయుతంగా, పారదర్శకంగా, ప్రశాంత వాతావరణంలో నిర్వహించేందుకు అవసరమైన అన్ని ముందస్తు ఏర్పాట్లను పకడ్బందీగా పూర్తి చేయాలని జిల్లా ఎన్నికల అధికారి, జిల్లా కలెక్టర్ డా. శ్రీధర్ చెరుకూరి అధికారులను ఆదేశించారు. సోమవారం కలెక్టరేట్లో జరిగిన సమీక్షా సమావేశంలో ఆయన ఈ సూచనలు చేశారు.
కలెక్టరేట్లోని ప్రజా సమస్యల పరిష్కార వేదిక సమావేశ మందిరంలో జాయింట్ కలెక్టర్ డా. నిధి మీనా, సబ్ కలెక్టర్ హెచ్.ఎస్. భావన, జిల్లా రెవెన్యూ అధికారి కె. మల్లికార్జునుడుతో కలిసి కడప నగరపాలక సంస్థతో పాటు జిల్లాలోని అన్ని మున్సిపాలిటీల కమిషనర్లు, సహాయ రిటర్నింగ్ అధికారులు, ఎన్నికల విధులు కేటాయించిన అధికారులతో కలెక్టర్ సమీక్ష సమావేశం నిర్వహించారు. ఈ సమావేశంలో ప్రధానంగా రానున్న ఎన్నికల నిర్వహణకు సంబంధించి ఇప్పటివరకు చేపట్టిన చర్యలను సమీక్షించి, తదుపరి చేపట్టాల్సిన పనులపై పలు సూచనలు, ఆదేశాలు జారీ చేశారు. రాష్ట్ర ఎన్నికల సంఘం జారీ చేసే మార్గదర్శకాలు, విధివిధానాలను క్షేత్రస్థాయిలో సమర్థవంతంగా అమలు చేయాలని సూచించారు. మున్సిపల్ ఎన్నికలతో పాటు గ్రామ పంచాయతీలు, ఎంపీటీసీ, జెడ్పీటీసీ ఎన్నికల నిర్వహణకు అవసరమైన సన్నద్ధతపై సంబంధిత అధికారులు ప్రత్యేక దృష్టి సారించాలన్నారు. ఎన్నికల ప్రక్రియలో ఎలాంటి జాప్యానికి తావులేకుండా ప్రతి అంశాన్ని ముందస్తుగా ప్రణాళికాబద్ధంగా పూర్తి చేయాలని సూచించారు. సంబంధిత శాఖల అధికారులు పరస్పర సమన్వయంతో పనిచేస్తూ, రాష్ట్ర ఎన్నికల సంఘం మార్గదర్శకాలకు అనుగుణంగా విధులు నిర్వర్తించాలని ఆదేశించారు. ఎన్నికల నిర్వహణలో భాగంగా ఎస్సీ, ఎస్టీ, బీసీ ఓటర్ల గుర్తింపు ప్రక్రియను నిబంధనల ప్రకారం చేపట్టాలని, ఓటరు జాబితాల ప్రచురణకు అవసరమైన చర్యలను వేగవంతం చేయాలని కలెక్టర్ సూచించారు. బ్యాలెట్ పెట్టెల సమీకరణ, బ్యాలెట్ పత్రాల ముద్రణకు అవసరమైన కాగితం సేకరణ, బ్యాలెట్ పత్రాల ముద్రణ, పోలింగ్ కేంద్రాల గుర్తింపు, ఏర్పాటు వంటి అంశాలపై ముందస్తు కార్యాచరణ రూపొందించాలన్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఎన్నికల విధుల నిర్వహణకు అవసరమైన సిబ్బందిని గుర్తించి నియామక ప్రక్రియ చేపట్టాలని, మాస్టర్ ట్రైనర్ల ద్వారా ఎన్నికల సిబ్బందికి సమగ్ర శిక్షణ అందించేందుకు ఏర్పాట్లు చేయాలని సూచించారు. పోలింగ్ కేంద్రాలు, ఎన్నికల సామగ్రి పంపిణీ, స్వీకరణ కేంద్రాలు, స్ట్రాంగ్ రూములు, ఓట్ల లెక్కింపు కేంద్రాలు, రవాణా సదుపాయాల ఏర్పాట్లపై గత ఎన్నికల అనుభవాలు, మార్గదర్శకాలను దృష్టిలో ఉంచుకుని తగిన చర్యలు చేపట్టాలన్నారు. ఎన్నికల విధులకు సిబ్బంది ఎంపికలో నిబంధనలను కచ్చితంగా పాటించాలని, ఎన్నికల ప్రక్రియలో ప్రత్యక్షంగా పాల్గొనే అధికారులు, సిబ్బందికి సంబంధించి నిర్దేశించిన అర్హతలు, నిబంధనలను పరిశీలించాలని కలెక్టర్ స్పష్టం చేశారు. ఎన్నికల విధుల నుంచి మినహాయింపుల విషయంలోనూ నిబంధనలను మాత్రమే ప్రామాణికంగా తీసుకోవాలని సూచించారు. రాష్ట్ర ఎన్నికల సంఘం నుంచి వెలువడే మార్గదర్శకాలు, ఎన్నికల షెడ్యూల్కు అనుగుణంగా అన్ని ఏర్పాట్లను నిర్ణీత గడువులో పూర్తి చేయాలని కలెక్టర్ ఆదేశించారు. ఎన్నికల నిర్వహణలో పారదర్శకత, నిష్పాక్షికతకు ప్రాధాన్యమిస్తూ, ఓటర్లు ఎలాంటి ఇబ్బందులు లేకుండా తమ ఓటు హక్కును వినియోగించుకునేలా జిల్లా యంత్రాంగం సమన్వయంతో పనిచేయాలని జిల్లా కలెక్టర్ సూచించారు.
