ఆకాశంలో అరుదైన, అందమైన దృశ్యం ఆవిష్కృతమైంది. పౌర్ణమి చంద్రుడు, మౌంట్ ఎట్నా అగ్నిపర్వతం నుంచి వెలువడుతున్న బూడిద, వాయువులు, సంధ్యా సమయంలో కనిపించే ప్రత్యేక కాంతి పట్టీ ఒకే ఫ్రేమ్లో కనిపించాయి. ఈ అద్భుత దృశ్యాన్ని నాసా తన ఆస్ట్రానమీ పిక్చర్ ఆఫ్ ది డేగా ప్రచురించింది. ఈ చిత్రాన్ని ఇటలీలోని సిసిలీ ప్రాంతంలో, నికోసియా పట్టణానికి సమీపంలో చిత్రీకరించారు.
నాసా వివరాల ప్రకారం.. ఈ చిత్రం సాధారణ ఛాయాచిత్రం కాదు, పలు దృశ్యాలను కలిపి రూపొందించిన సమ్మేళన చిత్రం. ఇందులో ఆకాశం క్రమంగా చీకటిగా మారుతున్న సమయంలో పౌర్ణమి చంద్రుడు ఉదయిస్తున్న దృశ్యం కనిపిస్తుంది. కిందివైపు ఉన్న మేఘాలు సంధ్యా కాంతి ప్రభావంతో వివిధ రంగుల్లో మెరిసిపోతుండగా, నేపథ్యంలోని ఎత్తైన ప్రాంతంలో మౌంట్ ఎట్నా నుంచి వెలువడుతున్న బూడిద, వాయువులు కనిపిస్తున్నాయి.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
బెల్ట్ ఆఫ్ వీనస్
చిత్రంలో కనిపించే గులాబీ రంగు కాంతి పట్టీని బెల్ట్ ఆఫ్ వీనస్గా పిలుస్తారు. సూర్యాస్తమయం సమయంలో సూర్యుడికి ఎదురుగా ఉన్న ఆకాశంలో ఈ కాంతి ప్రభావం కనిపిస్తుంది. భూమి వాతావరణంలోని కాంతి వ్యాప్తి కారణంగా ఈ ప్రాంతం గులాబీ లేదా ఎర్రటి ఛాయల్లో కనిపించవచ్చు. ఈ దృశ్యానికి కిందివైపు ఉన్న మేఘాల రంగులు కూడా మరింత ఆకర్షణను జోడించాయి.
