ముఖ్యమంత్రి పర్యటన: పటిష్ట భద్రత, ప్రజలకు ఇబ్బంది లేకుండా చర్యలు

తిరుపతి జిల్లా పోలీస్ కార్యాలయంలోని కాన్ఫరెన్స్ హాల్లో జరిగిన ఈ సమీక్షలో, సభా ప్రాంగణం, వీఐపీ రాకపోకల మార్గాలు, హెలిప్యాడ్, వేదిక పరిసరాలు, పార్కింగ్, ప్రజల ప్రవేశ, నిష్క్రమణ మార్గాలు, ట్రాఫిక్ మళ్లింపులు, బందోబస్తు పాయింట్లు, అత్యవసర స్పందన వ్యవస్థలపై విస్తృతంగా చర్చించారు. భద్రతా లోపాలకు తావులేకుండా సెక్యూరిటీ సూత్రాన్ని కచ్చితంగా అమలు చేయాలని ఎస్పీ స్పష్టం చేశారు.

కార్యక్రమానికి ముందు, తర్వాత సభా ప్రాంగణం, పరిసర ప్రాంతాలు, వీఐపీ మార్గాలలో యాంటీ సాబోటాజ్ తనిఖీలు నిరంతరాయంగా నిర్వహించాలని, బాంబు నిర్వీర్య దళం (బీడీఎస్), డాగ్ స్క్వాడ్, ఇంటెలిజెన్స్ బృందాలు, సీసీటీవీ పర్యవేక్షణ, డ్రోన్ నిఘా, కమ్యూనికేషన్ నెట్వర్క్ను పూర్తి స్థాయిలో వినియోగించి బహుళస్థాయి భద్రతా వలయాన్ని ఏర్పాటు చేయాలని ఆదేశించారు.

ప్రతి అధికారి తనకు కేటాయించిన బాధ్యతను సంపూర్ణంగా నిర్వర్తించాలని, అన్ని విభాగాలు సమన్వయంతో పనిచేస్తూ ఎటువంటి అవాంఛనీయ ఘటనలకు ఆస్కారం లేకుండా అప్రమత్తంగా ఉండాలని సూచించారు. ట్రాఫిక్ నియంత్రణ, పార్కింగ్, ప్రజల రాకపోకలు, అత్యవసర సేవల నిర్వహణలో సాధారణ ప్రజలకు ఎలాంటి అసౌకర్యం కలగకుండా సమర్థవంతమైన కార్యాచరణను అమలు చేయాలని అధికారులను ఆదేశించారు.

ఈ సమావేశంలో అదనపు ఎస్పీలు శ్రీనివాసులు, రవి మనోహర్ ఆచారి, శ్రీలత, శ్రీనివాస్ రావు, ఎస్బీ డీఎస్పీ గీతా కుమారి, జిల్లాలోని డీఎస్పీలు, సీఐలు, ఆర్ఐలు, ఇతర పోలీసు అధికారులు పాల్గొన్నారు.