భారత్-ఖతార్ ఆర్థిక, వాణిజ్య సంబంధాలను బలోపేతం చేసే దిశగా కేంద్ర ఆర్థిక మంత్రి నిర్మలా సీతారామన్ కీలక చర్చలు జరిపారు. దోహాలో ఖతార్ ఆర్థిక మంత్రి అలీ బిన్ అహ్మద్ అల్ కువారీతో సమావేశమైన ఆమె, భారత్లో ఖతార్ ప్రకటించిన 10 బిలియన్ డాలర్ల పెట్టుబడి అమలు, ద్వైపాక్షిక పెట్టుబడి ఒప్పందం, యూపీఐ విస్తరణ వంటి అంశాలపై దృష్టి సారించారు.
ఖతార్లో భారత యూనిఫైడ్ పేమెంట్స్ ఇంటర్ఫేస్ (యూపీఐ) సేవలను మరింత విస్తరించే అంశంపై ఇరుదేశాల మంత్రులు చర్చించారు. ఖతార్లో యూపీఐ ఇప్పటికే కొన్ని పాయింట్ ఆఫ్ సేల్ కేంద్రాల్లో అందుబాటులో ఉండగా, దేశవ్యాప్తంగా దాని వినియోగాన్ని విస్తరించే దిశగా భారత్, ఖతార్ గతంలోనే అంగీకరించాయి.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
అలాగే ద్వైపాక్షిక పెట్టుబడి ఒప్పందం (బీఐటీ)ను త్వరగా ఖరారు చేయడం, భారత్లో ఖతార్ పెట్టుబడులకు సంబంధించిన కట్టుబాట్ల అమలు, నేషనల్ ఇన్ఫ్రాస్ట్రక్చర్ అండ్ ఇన్వెస్ట్మెంట్ ఫండ్తో ఖతార్ మరింతగా భాగస్వామ్యం కావడం వంటి అంశాలు సమావేశంలో ప్రస్తావనకు వచ్చాయి. వాణిజ్యం, పెట్టుబడులు, పన్నుల విషయంలో మరింత స్పష్టత కోసం ద్వంద్వ పన్నుల నివారణ ఒప్పందం గురించి కూడా చర్చించారు.
