ముంబైలో స్పెషల్ 26 తరహా నకిలీ ఐటీ రైడ్.. వ్యాపారి నుంచి రూ.1 కోటి డిమాండ్.. డాక్సిన్ టైమ్స్

వ్యాపారి ఇంటి వద్దకు బైక్పై వచ్చిన ఇద్దరు వ్యక్తులు తమను ఆదాయపు పన్ను అధికారులుగా పరిచయం చేసుకుని, ఐడీ కార్డులు చూపించారు. అనంతరం వ్యాపారి దంపతులను వారు బుక్ చేసుకున్న క్యాబ్లోనే బలవంతంగా ఎక్కించి కార్యాలయానికి తీసుకెళ్లారు. వారి మొబైల్ ఫోన్లను కూడా తీసుకున్నారు.

కార్యాలయానికి చేరుకున్నాక, ఆరుగురు పురుషులు, ముగ్గురు మహిళలు తమను దర్యాప్తు బృందంగా పరిచయం చేసుకున్నారు. నకిలీ సెర్చ్ వారెంట్ చూపించి వ్యాపారి సంతకాలు తీసుకున్నారు. పెట్టి క్యాష్ నిబంధనలను ఉల్లంఘించారంటూ రూ.1.70 లక్షల నగదును స్వాధీనం చేసుకున్నారు. అంతేకాకుండా రూ.1.44 కోట్ల భారీ జరిమానా విధిస్తామని బెదిరించారు.

కేసును అక్కడితో ముగించేందుకు, అరెస్టు నుంచి తప్పించేందుకు రూ.1 కోటి చెల్లించాలని డిమాండ్ చేశారు. అయితే, వ్యాపారి అధికారిక నోటీసు ఇవ్వాలని కోరడంతో నిందితులు బెదిరింపులకు పాల్పడి అక్కడి నుంచి వెళ్లిపోయారు.

అనుమానం వచ్చిన వ్యాపారి వెంటనే తన చార్టర్డ్ అకౌంటెంట్, ఆదాయపు పన్ను శాఖ అధికారులను సంప్రదించడంతో అది నకిలీ ఐటీ రైడ్ అని నిర్ధారణ అయింది. దీంతో అంధేరీ పోలీస్ స్టేషన్లో ఫిర్యాదు చేశారు.

పోలీసులు సుమారు 50 ప్రాంతాల్లోని సీసీటీవీ ఫుటేజీలను న ఆరుగురు నిందితులను అరెస్టు చేశారు. ఈ కేసులో వ్యాపారి మాజీ డ్రైవర్ కూడా కీలక పాత్ర పోషించినట్లు, అతడే ఇతర నిందితులకు సమాచారం అందించినట్లు దర్యాప్తులో వెల్లడైంది. అరెస్టయిన వారిలో కొందరిపై ఇలాంటి నేరాలకు సంబంధించిన పాత కేసులు కూడా ఉన్నట్లు పోలీసులు తెలిపారు. మరో ముగ్గురు నిందితుల కోసం గాలింపు కొనసాగుతోంది.