ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ కాంగ్రెస్ పార్టీ శుక్రవారం దేశవ్యాప్తంగా నిరసనలకు పిలుపునిచ్చింది. ఢిల్లీ, పాట్నా, కోల్కతా, చండీగఢ్, అసోం వంటి పలు ప్రాంతాల్లో కాంగ్రెస్ కార్యకర్తలు ర్యాలీలు, ఆందోళనలు నిర్వహించారు.
ఢిల్లీలో ఇండియన్ యూత్ కాంగ్రెస్ కార్యకర్తలు జ్ఞానేశ్ కుమార్ ముఖచిత్రాలతో కూడిన మాస్కులు ధరించి, చేతులకు సంకెళ్లు వేసుకుని నిరసన తెలిపారు. రైసినా రోడ్డులోని యూత్ కాంగ్రెస్ కార్యాలయం నుంచి ఎన్నికల సంఘం ప్రధాన కార్యాలయం వైపు ర్యాలీగా వెళ్లేందుకు ప్రయత్నించగా, పోలీసులు పలువురు కార్యకర్తలను అదుపులోకి తీసుకున్నారు.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
పాట్నాలో కాంగ్రెస్ కార్యకర్తలు ఎన్నికల సంఘం కార్యాలయం వైపు ర్యాలీగా వెళ్లేందుకు ప్రయత్నించగా పోలీసులు వాటర్ క్యానన్లను ఉపయోగించి వారిని అడ్డుకున్నారు. అసోంలో రాష్ట్ర కాంగ్రెస్ అధ్యక్షుడు గౌరవ్ గొగోయ్ సహా పలువురు నాయకులను పోలీసులు అదుపులోకి తీసుకున్నట్లు అధికారులు తెలిపారు.
