ఉత్తరప్రదేశ్ పోలీసుల దర్యాప్తు తీరుపై సుప్రీంకోర్టు తీవ్ర అసంతృప్తి వ్యక్తం చేసింది. ఒక కేసులో నిందితుడిని సంఘటనా స్థలంలోనే పట్టుకున్నప్పటికీ, ఎఫ్ఐఆర్లో అతడి పేరును పేర్కొనకుండా గుర్తుతెలియని వ్యక్తిగా నమోదు చేయడంపై న్యాయస్థానం ప్రశ్నలు సంధించింది. ఈ వ్యవహారంపై విచారణ సందర్భంగా జస్టిస్ సంజయ్ కుమార్, జస్టిస్ సంజీవ్ సచ్దేవలతో కూడిన ధర్మాసనం పోలీసులపై తీవ్ర వ్యాఖ్యలు చేసింది.
నిందితుడిని పోలీసులు సంఘటనా స్థలంలోనే అదుపులోకి తీసుకున్నట్లు కోర్టు దృష్టికి వచ్చినప్పటికీ, ఎఫ్ఐఆర్లో అతడి పేరును ఎందుకు నమోదు చేయలేదని ధర్మాసనం ప్రశ్నించింది. ఇలాంటి విధానంతో ప్రజలు పోలీసులను ఎలా విశ్వసిస్తారని వ్యాఖ్యానించింది. పోలీసుల దర్యాప్తులో పలు లోపాలు కనిపిస్తున్నాయని, ఇలాంటి పరిస్థితులు కొనసాగితే పోలీసులపై ప్రజల నమ్మకం దెబ్బతింటుందని పేర్కొంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ కేసులో పోలీసులు సమర్పించిన అఫిడవిట్పై కూడా కోర్టు అసంతృప్తి వ్యక్తం చేసింది. ఎఫ్ఐఆర్లో తొలుత నిందితుడి పేరు లేకపోవడానికి, అనంతరం అతడి పేరును చేర్చడానికి గల కారణాలను వివరించాలని సంబంధిత అధికారిని ఆదేశించింది. తదుపరి విచారణకు సంబంధిత పోలీసు అధికారి కోర్టుకు హాజరు కావాలని ధర్మాసనం ఆదేశించింది.
