జనాభా గణన 2027: పారదర్శకంగా, పకడ్బందీగా నిర్వహించాలి - కామారెడ్డి కలెక్టర్ ఆశిష్ సంగ్వాన్

ఈ సందర్భంగా జిల్లా కలెక్టర్ మాట్లాడుతూ, జనాభా గణన ద్వారా సేకరించే సమాచారం భవిష్యత్తులో ప్రభుత్వ సంక్షేమ పథకాల అమలు, మౌలిక సదుపాయాల కల్పన, ప్రజల అవసరాలకు అనుగుణంగా అభివృద్ధి ప్రణాళికల రూపకల్పనకు ఎంతో కీలకమని తెలిపారు. జనాభా గణనలో ఎలాంటి పొరపాట్లకు తావులేకుండా, నిబంధనల ప్రకారం సమాచారాన్ని సేకరించి నమోదు చేయాలని సూచించారు.

జనాభా గణనకు సంబంధించిన విధివిధానాలపై అధికారులకు పూర్తి అవగాహన ఉండాలని, క్షేత్రస్థాయిలో చేపట్టాల్సిన చర్యలపై ముందస్తు ప్రణాళికతో సిద్ధంగా ఉండాలని పేర్కొన్నారు. సంబంధిత శాఖల అధికారులు పరస్పర సమన్వయంతో పనిచేస్తూ, జనాభా గణన ప్రక్రియను విజయవంతంగా పూర్తి చేయాలని ఆదేశించారు.

అంతకుముందు జనాభా గణన 2027లో భాగంగా రెండో దశ జనాభా లెక్కింపునకు సంబంధించి రెండు రోజులపాటు ప్రత్యేక శిక్షణ కార్యక్రమం నిర్వహించారు. ఈ శిక్షణలో మాస్టర్ శిక్షకులు డాక్టర్ భుక్య రవి కుమార్, ఏ.ఆర్. యుగంధర్ బాబు క్షేత్రస్థాయిలో సమాచార సేకరణ, నమోదు విధానం, సాంకేతిక అంశాలు, తీసుకోవాల్సిన జాగ్రత్తలపై అధికారులకు అవగాహన కల్పించారు.

ఈ కార్యక్రమంలో అదనపు కలెక్టర్ (రెవెన్యూ) విక్టర్, జిల్లా రెవెన్యూ అధికారి పాండు, బాన్సువాడ ఆర్డీవో రవీందర్, ఎల్లారెడ్డి ఆర్డీవో ప్రభాకర్, ముఖ్య ప్రణాళిక అధికారి రఘునందన్, సంబంధిత అధికారులు, జిల్లాలోని 25 మండలాలు, 4 మున్సిపాలిటీలకు చెందిన తహసీల్దారులు, మండల పరిషత్ అభివృద్ధి అధికారులు, మున్సిపల్ కమిషనర్లు, ఇతర సంబంధిత అధికారులు పాల్గొన్నారు.