కంది సెంట్రల్ జైలులో ఆకస్మిక తనిఖీ: ఖైదీల సదుపాయాలపై ఆరా తీసిన న్యాయ సేవాధికార సంస్థ కార్యదర్శి

జైలులో ఉన్న ఖైదీలను కలిసి, వారికి అందుతున్న సదుపాయాలు, భోజనం నాణ్యత గురించి కార్యదర్శి సౌజన్య అడిగి తెలుసుకున్నారు. ఖైదీల బెయిరక్ గదులను క్షుణ్ణంగా పరిశీలించి, వారికి అవసరమైన అన్ని సదుపాయాలు కల్పించాలని జైలర్ కు సూచించారు. ఖైదీలకు సమయానికి బెయిల్స్, ములాఖత్ లు అందుతున్నాయా అని అడిగి తెలుసుకున్నారు.

కేసుల పరిష్కారానికి ఉచిత న్యాయవాదిని నియమించే విషయాన్ని కూడా ఖైదీలకు తెలియపరిచారు. ఖైదీలకు అందిస్తున్న భోజనం రుచి చూసిన కార్యదర్శి, వారి కోసం నిల్వ ఉంచిన కూరగాయలు, బియ్యం ఉన్న గదిని కూడా పరిశీలించారు.

జైలులో ఉన్న లీగల్ ఎయిడ్ క్లినిక్ ను కూడా ఆమె సందర్శించి, అక్కడి ఏర్పాట్లను సమీక్షించారు.

ఈ ఆకస్మిక తనిఖీలో జైలర్ సత్తయ్య, లీగల్ ఎయిడ్ డిఫెన్స్ కౌన్సిల్ సిస్టం న్యాయవాదులు, జైలు సిబ్బంది తదితరులు పాల్గొన్నారు.