మైనారిటీ సంక్షేమం, న్యాయపాలనలో రాష్ట్ర ప్రభుత్వం గణనీయమైన పురోగతి సాధించింది: మంత్రి నస్యం మహమ్మద్ ఫరూక్

గురువారం రాష్ట్ర సచివాలయంలో నిర్వహించిన పాత్రికేయుల సమావేశంలో మంత్రి మాట్లాడుతూ, గత రెండేళ్లలో మైనారిటీల సంక్షేమం, విద్య, ఉపాధి, ఆర్థిక సాధికారత, వక్ఫ్ ఆస్తుల పరిరక్షణ, హజ్ సేవలు, డిజిటల్ పరిపాలన, న్యాయ సంస్కరణలు, కోర్టుల మౌలిక వసతుల అభివృద్ధి, న్యాయవాదుల సంక్షేమం, ఈ-కోర్టుల విస్తరణ వంటి అన్ని రంగాల్లో ప్రభుత్వం గణనీయమైన పురోగతి సాధించిందని పేర్కొన్నారు.

2026-27లో కూడా మైనారిటీల సాధికారత, సమాన న్యాయం, నాణ్యమైన న్యాయపాలన, మౌలిక వసతుల అభివృద్ధి, యువతకు నైపుణ్య శిక్షణ, ఉపాధి అవకాశాల కల్పనకు మరింత ప్రాధాన్యతనిస్తూ, ప్రతి పౌరుడికి న్యాయం, ప్రతి కుటుంబానికి సంక్షేమం అందించడమే ప్రభుత్వ లక్ష్యమని, 'స్వర్ణాంధ్రప్రదేశ్–2047' విజన్ సాధనలో ఇదే దిశగా ముందుకు సాగుతున్నామని మంత్రి స్పష్టం చేశారు.

మైనారిటీల సంక్షేమ శాఖకు 2024-25 నుండి 2026-27 వరకు రూ.16,147.23 కోట్ల బడ్జెట్ కేటాయించగా, గత రెండేళ్లలో రూ.9,759.70 కోట్లు వ్యయం చేయబడిందని, ఇందులో మైనారిటీల సంక్షేమ కార్యక్రమాల అమలుకు రూ.4,850.91 కోట్లు నేరుగా ఖర్చు చేయడం జరిగిందని మంత్రి తెలిపారు. ప్రభుత్వం అమలు చేస్తున్న వివిధ సంక్షేమ పథకాల ద్వారా మైనారిటీ వర్గాలకు విస్తృత స్థాయిలో ప్రయోజనం చేకూరిందని, NTR భరోసా పెన్షన్, తల్లికి వందనం, పోస్ట్ మెట్రిక్ స్కాలర్‌షిప్స్, దీపం-2 పథకాల ద్వారా లక్షలాది కుటుంబాలకు లబ్ధి చేకూరిందని వివరించారు.

విద్య ద్వారా సాధికారతకు ప్రభుత్వం విశేష ప్రాధాన్యతనిస్తోందని, "తాలిమ్-ఎ-హునర్" పథకం ద్వారా పేద విద్యార్థులకు కార్పొరేట్ కళాశాలల్లో ఉచిత రెసిడెన్షియల్ ఇంటర్మీడియట్ విద్యను అందిస్తోందని మంత్రి తెలిపారు. వక్ఫ్ ఆస్తుల పరిరక్షణ, నిర్వహణలో ప్రభుత్వం కీలక విజయాలు సాధించిందని, 1,500 వక్ఫ్ సంస్థల సర్వేను పూర్తి చేయడంతో పాటు, 88 ఎకరాల వక్ఫ్ భూమిని ఆక్రమణదారుల నుంచి తిరిగి స్వాధీనం చేసుకున్నట్లు పేర్కొన్నారు. హజ్ యాత్రికులకు అత్యుత్తమ సేవలు అందిస్తూ, PMJVK, PM-VIKAS ద్వారా మౌలిక వసతులు, నైపుణ్యాభివృద్ధి, ఉర్దూ భాషాభివృద్ధి, డిజిటల్ శిక్షణ, న్యాయపాలన బలోపేతానికి సంస్కరణలు, న్యాయవాదుల సంక్షేమం, కోర్టుల బలోపేతం వంటి అంశాల్లో గణనీయమైన పురోగతి సాధించినట్లు మంత్రి వివరించారు. 2026-27లో మరిన్ని ప్రతిష్ఠాత్మక కార్యక్రమాలతో విద్య, డిజిటల్ నైపుణ్యాలు, న్యాయపాలన, మౌలిక వసతులు మరియు మైనారిటీల సాధికారతను మరింత వేగవంతం చేయనున్నట్లు తెలిపారు.