దేశవ్యాప్తంగా నిర్వహించే జాతీయ స్థాయి ప్రవేశ పరీక్షల విశ్వసనీయత, పారదర్శకతను మెరుగుపరిచేందుకు పార్లమెంటరీ కమిటీ కీలక సిఫార్సులు చేసింది. పరీక్షల్లో అక్రమాలు, ప్రశ్నపత్రాల లీకేజీలు, నిర్వహణలో లోపాలపై ఆందోళనలు వ్యక్తమవుతున్న నేపథ్యంలో, ఈ వ్యవస్థలో సంస్కరణలు అవసరమని కమిటీ అభిప్రాయపడింది. ముఖ్యంగా నీట్ యూజీ పరీక్ష వివాదం నేపథ్యంలో ఈ అంశానికి ప్రాధాన్యం పెరిగింది.
దేశంలో జేఈఈ మెయిన్స్, నీట్ యూజీ, యూజీసీ నెట్, సీయూఈటీ వంటి కీలక పరీక్షలను జాతీయ పరీక్షల సంస్థ (ఎన్టీఏ) నిర్వహిస్తోంది. ఏటా సుమారు 1.2 కోట్ల మంది అభ్యర్థులు హాజరయ్యే ఈ పరీక్షల నిర్వహణలో భద్రత, పారదర్శకత అత్యంత కీలకమని పార్లమెంటరీ కమిటీ నొక్కి చెప్పింది. నీట్ యూజీ 2026 పరీక్ష రద్దు, గతంలో తలెత్తిన వివాదాలు వ్యవస్థలో మరిన్ని సంస్కరణల అవసరాన్ని సూచిస్తున్నాయని కమిటీ పేర్కొంది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ప్రశ్నపత్రాల లీకేజీ నివారణకు సూచనలు
పరీక్షల భద్రతను పెంచేందుకు విస్తృతమైన ప్రశ్నల బ్యాంకును రూపొందించాలని, వివిధ అంశాలు, కఠినతా స్థాయులకు అనుగుణంగా ప్రశ్నలను సిద్ధం చేసి, నిరంతరం నవీకరించాలని కమిటీ సూచించింది. పరీక్షకు కొద్ది సమయం ముందు డిజిటల్ విధానంలో ప్రశ్నలను ఎంపిక చేసి, తుది ప్రశ్నపత్రాన్ని రూపొందించడం ద్వారా లీకేజీ ప్రమాదాన్ని తగ్గించవచ్చని అభిప్రాయపడింది. ప్రశ్నపత్రాల రూపకల్పన, అనువాదం వంటి బాధ్యతలకు ఐఐటీలు, ఎయిమ్స్, ఐఐఎంల వంటి ప్రముఖ విద్యాసంస్థల నిపుణులను వినియోగించాలని, వారి నేపథ్యాన్ని పరిశీలించాలని సూచించింది.
