రాజంపేటలో నామినేషన్ల ప్రక్రియకు ఆటంకం - టీడీపీ గూండాల బెదిరింపులు, పోలీసుల సహకారంపై వైసీపీ ఆరోపణలు

పోలీసుల తీరుపై విమర్శలు

పోలీసులు టీడీపీ గూండాలకు బాడీగార్డులుగా వ్యవహరిస్తున్నారని ఆరోపించారు. వైసీపీ నేతలు ఫోన్ చేస్తే ఫోన్ ఎత్తడం లేదని, ఫిర్యాదు చేయడానికి వెళ్తే నామినేషన్ వేయకుండా ఇంట్లో కూర్చోండి అని సలహా ఇస్తున్నారని తెలిపారు. రాజంపేటలో ఎన్నికల కమిషన్ అంటూ ఒకటి ఉందా లేక అది కూడా టీడీపీ ఆఫీస్ లోనే ఉందా అని ప్రజలు ప్రశ్నిస్తున్నారని పేర్కొన్నారు. ఎన్నికల నియమావళి ప్రకారం నామినేషన్ కేంద్రానికి 100 మీటర్ల పరిధిలోకి అనధికార వ్యక్తులు రాకూడదని నిబంధన ఉన్నప్పటికీ, ఇక్కడ మున్సిపల్ ఆఫీస్ లోపలే గంజాయి గూండాలు తిష్ట వేశారని ఆరోపించారు.

ఎన్నికల కమిషన్కు విజ్ఞప్తి

రాజంపేట వైసీపీ మున్సిపల్ కౌన్సిలర్ అభ్యర్థులు ఎన్నికల కమిషన్ కు విజ్ఞప్తి చేశారు. అయ్యా ఎన్నికల కమిషనర్ గారు, మేము నామినేషన్లకు సిద్ధంగా ఉన్నాం. మాకు పోటీ చేయాలని ఉంది. గెలుపు ఓటములు సహజం, తీర్పు ఇచ్చేది ప్రజలే. కానీ మమ్మల్ని నామినేషన్ వేయనివ్వకుండా రాళ్లు, రాడ్లు, కత్తులతో అడ్డుకోవడం దారుణమని తెలిపారు. మాకు రక్షణ కల్పించాలని, మున్సిపల్ ఆఫీస్ వద్ద కేంద్ర బలగాలను మోహరించాలని, టీడీపీ గంజాయి గూండాలను, వారికి సహకరిస్తున్న పోలీసులను వెంటనే అక్కడి నుండి తొలగించాలని, మాకు ప్రజాస్వామ్యబద్ధంగా నామినేషన్ వేసుకునే అవకాశం కల్పించాలని కోరారు. లేదంటే రాజంపేటలో ఎన్నికలు జరిగినట్లు కాదు, టీడీపీ గూండాలు ఎన్నికలను హైజాక్ చేసినట్లు చరిత్రలో నిలిచిపోతుందని తెలిపారు.