కడపలో కల్తీ ఆహారంపై ఉక్కుపాదం: హోటళ్లు, రెస్టారెంట్లలో ఫుడ్ సేఫ్టీ అధికారుల ముమ్మర తనిఖీలు

హోటళ్లు, రెస్టారెంట్లలో వినియోగిస్తున్న వంట నూనెల నాణ్యత, కూరగాయలు, పాలు, పన్నీర్, ఇతర పాల ఉత్పత్తుల నాణ్యతను కూడా పరిశీలించారు. ఆహార పదార్థాల్లో కల్తీకి అవకాశం ఉన్న ప్రాంతాలు, నాణ్యతా ప్రమాణాలు పాటించని విధానాలపై ప్రత్యేకంగా దృష్టి సారించారు.

నిబంధనల ప్రకారం ఆహార పదార్థాలను నిల్వ చేస్తున్నారా, పరిశుభ్రమైన వాతావరణంలో తయారు చేస్తున్నారా అనే అంశాలను కూడా అధికారులు పరిశీలించారు. తనిఖీల సందర్భంగా అనుమానాస్పదంగా ఉన్న పన్నీర్, పాల ఉత్పత్తులు, ఇతర ఆహార పదార్థాల నుంచి నమూనాలను సేకరించారు.

సేకరించిన నమూనాలను నాణ్యతా ప్రమాణాల పరిశీలన కోసం ఆహార పరిశోధన ప్రయోగశాలకు పంపినట్లు డాక్టర్ హరిత తెలిపారు. ప్రయోగశాల నుంచి వచ్చే నివేదిక ఆధారంగా తదుపరి చర్యలు చేపడతామని పేర్కొన్నారు.

ఆహార పదార్థాలు నాణ్యతా ప్రమాణాలకు అనుగుణంగా లేవని లేదా నిబంధనలను ఉల్లంఘించినట్లు ప్రయోగశాల నివేదికల్లో నిర్ధారణ అయితే, సంబంధిత యాజమాన్యాలపై ఆహార భద్రత, ప్రమాణాల చట్టం2006 ప్రకారం కఠిన చర్యలు తీసుకుంటామని డాక్టర్ హరిత స్పష్టం చేశారు. ప్రజల ఆరోగ్యానికి హాని కలిగించే విధంగా కల్తీ లేదా నాసిరకం ఆహారాన్ని విక్రయించే వారిని ఉపేక్షించబోమని తెలిపారు.

ప్రజలకు సురక్షితమైన, పరిశుభ్రమైన, నాణ్యమైన ఆహారం అందించడం ఫుడ్ సేఫ్టీ విభాగం ప్రధాన బాధ్యత అని ఆమె పేర్కొన్నారు. ఆహార పదార్థాల నాణ్యతపై అనుమానాలు ఉన్నా, కల్తీ ఆహారం విక్రయిస్తున్నట్లు గుర్తించినా ప్రజలు సంబంధిత అధికారులకు సమాచారం అందించాలని సూచించారు. ఇందుకోసం 104, 1967 హెల్ప్లైన్ల ద్వారా ఫిర్యాదు చేయవచ్చని తెలిపారు.

హోటళ్లు, రెస్టారెంట్లు, ఆహార తయారీ, పంపిణీ కేంద్రాలపై తనిఖీలు నిరంతరం కొనసాగుతాయని డాక్టర్ హరిత, ఓ.వి. రాముడు తెలిపారు. ఆహార భద్రతా నిబంధనలను ప్రతి యాజమాన్యం తప్పనిసరిగా పాటించాలని, వంటశాలలు, నిల్వ ప్రదేశాలను పరిశుభ్రంగా ఉంచడంతో పాటు నాణ్యమైన ముడి పదార్థాలను మాత్రమే వినియోగించాలని సూచించారు.

ఈ తనిఖీల ఉద్దేశం కేవలం నిబంధనలు ఉల్లంఘించిన వారిపై చర్యలు తీసుకోవడం మాత్రమే కాదని, ఆహార వ్యాపార నిర్వాహకుల్లో నాణ్యత, పరిశుభ్రత, ఆహార భద్రతపై మరింత అవగాహన పెంచి ప్రజల ఆరోగ్యాన్ని కాపాడటమే ప్రధాన లక్ష్యమని వారు తెలిపారు.