విధుల్లో నిర్లక్ష్యం.. సుండుపల్లె సీడీపీవో సస్పెండ్

సమగ్ర శిశు అభివృద్ధి సేవల పథకం అమలులో నిర్లక్ష్యంగా వ్యవహరించినందుకు సుండుపల్లె సీడీపీవో రాజమ్మను ఉన్నతాధికారులు సస్పెండ్ చేశారు. ఈ విషయం ఆలస్యంగా వెలుగులోకి వచ్చింది. సుండుపల్లె, వీరబల్లి మండలాల్లోని అంగన్వాడీ కేంద్రాల ద్వారా చిన్నారులు, గర్భిణీలు, బాలింతలకు పౌష్టికాహారం అందించడంలో ఆమె నిర్లక్ష్యం వహించినట్లు ఫిర్యాదులు అందాయి.

సుండుపల్లెలో 2024లో ఐసీడీఎస్ కార్యాలయాన్ని ఏర్పాటు చేశారు. ఈ కార్యాలయం సుండుపల్లె, వీరబల్లి మండలాల్లోని అంగన్వాడీల ద్వారా చిన్నారులు, గర్భిణీలు, బాలింతలకు మెరుగైన పౌష్టికాహారం అందించే లక్ష్యంతో పనిచేస్తోంది. ఈ రెండు మండలాలకు కలిపి ఒక సీడీపీవోను నియమించారు.

రెండు మండలాల పరిధిలో మొత్తం 183 అంగన్వాడీ కేంద్రాలు ఉన్నాయి. వీటి ద్వారా 477 మంది గర్భిణీలు, 431 మంది బాలింతలు, 4,435 మంది చిన్నారులకు పౌష్టికాహారం అందిస్తున్నారు. ఈ కేంద్రాలకు కేంద్ర, రాష్ట్ర ప్రభుత్వాలు నిత్యవసర సరుకులు, పాలు, గుడ్లు, బాలామృతం వంటి ఆహార పదార్థాలను సరఫరా చేస్తున్నాయి.