ఎన్సీఎల్టీ, ఎన్సీఎల్ఏటీలపై కార్పొరేట్ వ్యవహారాల శాఖ జోక్యంపై డాక్సిన్ టైమ్స్ లో సుప్రీంకోర్టు తీవ్ర వ్యాఖ్యలు

ఈ సందర్భంగా సీజేఐ సూర్యకాంత్ మాట్లాడుతూ.. ట్రిబ్యునల్ నియామక వ్యవస్థను కార్పొరేట్ వ్యవహారాల శాఖ పూర్తిగా తన ఆధీనంలోకి తీసుకున్నట్లు కనిపిస్తోందని, ఇది సంస్థ స్వతంత్రతను దెబ్బతీస్తోందని వ్యాఖ్యానించారు. నియామకాల్లో ట్రిబ్యునల్ అధ్యక్షులకే పూర్తి అధికారం ఉండాలని అభిప్రాయపడ్డారు.

యూపీఎస్సీ, ఎస్ఎస్సీ ద్వారా నియామకాలు

ట్రిబ్యునళ్లలో సిబ్బంది కొరతను అధిగమించేందుకు తాత్కాలికంగా అనుభవం ఉన్న ప్రభుత్వ ఉద్యోగులను డిప్యుటేషన్పై నియమించాలని సుప్రీంకోర్టు సూచించింది. దీర్ఘకాలిక పరిష్కారంగా దశలవారీగా శాశ్వత నియామకాలు చేపట్టాలని పేర్కొంది. ఇందుకోసం యూనియన్ పబ్లిక్ సర్వీస్ కమిషన్ (యూపీఎస్సీ), స్టాఫ్ సెలక్షన్ కమిషన్ (ఎస్ఎస్సీ) సహకారం తీసుకోవచ్చని సూచించింది.

అయితే, ప్రస్తుతం కాంట్రాక్టు విధానంలో పనిచేస్తున్న ఉద్యోగులకు కేవలం ఎక్కువకాలం పనిచేశారనే కారణంతో కొనసాగింపు హామీ ఇవ్వలేమని ధర్మాసనం స్పష్టం చేసింది. వారి నియామక ప్రక్రియపైనా ప్రశ్నలు లేవనెత్తింది. ఈ అంశంలో మధ్యంతర రక్షణ కల్పించేందుకు కోర్టు నిరాకరించింది.

253 పోస్టులు ఖాళీ

ఎన్సీఎల్టీకి మంజూరైన 320 పరిపాలనా పోస్టుల్లో కేవలం 67 మాత్రమే భర్తీ అయ్యాయని, ఇంకా 253 పోస్టులు ఖాళీగా ఉన్నాయని నివేదికలు వెల్లడించాయి. న్యాయ, సాంకేతిక సభ్యుల పోస్టుల్లోనూ ఖాళీలు ఉన్నట్లు కోర్టు దృష్టికి వచ్చింది. సిబ్బంది కొరతతో పాటు మౌలిక సదుపాయాల సమస్యలు ట్రిబ్యునళ్ల పనితీరుపై ప్రభావం చూపుతున్నాయని న్యాయవాదులు వివరించారు.

ఎన్సీఎల్టీ, ఎన్సీఎల్ఏటీల అధ్యక్షులు తమ సంస్థలకు అవసరమైన భవనాలు, స్థలాలు, పరిపాలనా సిబ్బంది, ఇతర మౌలిక సదుపాయాల వివరాలతో సమగ్ర ప్రతిపాదనలు సమర్పించాలని సుప్రీంకోర్టు ఆదేశించింది. నాలుగు వారాల్లో ఈ వివరాలు అందించాలని సూచించింది. ట్రిబ్యునళ్లకు అవసరమైన కనీస సదుపాయాలను వీలైనంత త్వరగా కల్పించేలా కేంద్ర ప్రభుత్వంతో మాట్లాడాలని అటార్నీ జనరల్ ఆర్. వెంకటరమణిని కోరింది.

ఈ కేసులో కేంద్ర ప్రభుత్వానికి, సంబంధిత ట్రిబ్యునళ్లకు నోటీసులు జారీ చేసిన ధర్మాసనం తదుపరి విచారణలో నియామక వ్యవస్థ, పరిపాలనా స్వతంత్రత, మౌలిక సదుపాయాల సమస్యలను పరిశీలించనుంది.

కంపెనీల మధ్య వివాదాలు, దివాలా పరిష్కార ప్రక్రియలు, సంస్థల మూసివేత, కంపెనీల చట్టానికి సంబంధించిన అంశాలను విచారించే న్యాయ సంస్థ నేషనల్ కంపెనీ లా ట్రిబ్యునల్. దీని ఆదేశాలపై అప్పీళ్లను నేషనల్ కంపెనీ లా అప్పిలేట్ ట్రిబ్యునల్ విచారిస్తుంది. ఈ సంస్థలు సమర్థంగా పనిచేయాలంటే స్వతంత్ర నియామక వ్యవస్థతో పాటు తగిన సిబ్బంది, మౌలిక సదుపాయాలు అవసరమని తాజా విచారణలో సుప్రీంకోర్టు అభిప్రాయపడింది.