కామారెడ్డి పోలీసుల వలలో అంతర్రాష్ట్ర నేర ముఠా.. ఐదుగురు అరెస్ట్

ఆగస్టు 4న కామారెడ్డి పట్టణంలోని జయశంకర్ కాలనీకి చెందిన అజ్జస్ నిరేష్ కుటుంబ సభ్యులతో కలిసి ఇంటికి తాళం వేసి బయటకు వెళ్లగా, గుర్తు తెలియని వ్యక్తులు ఇంటి తాళం పగులగొట్టి లోపలికి ప్రవేశించి వస్తువులను చెల్లాచెదురు చేసి టీవీ సమీపంలో ఉంచిన రూ.2 వేల నగదును అపహరించారు. బాధితుడి ఫిర్యాదు మేరకు టౌన్ పోలీస్ స్టేషన్లో కేసు నమోదు చేసి వెంటనే దర్యాప్తు ప్రారంభించారు.

సాంకేతిక ఆధారాలతో ముఠా గుట్టు రట్టు

సీసీటీవీ ఫుటేజీలు, ఇతర సాంకేతిక ఆధారాల ద్వారా అనుమానితులను గుర్తించిన పోలీసులు కామారెడ్డి రైల్వే స్టేషన్ వద్ద ప్రత్యేక తనిఖీలు నిర్వహించారు. తెల్లవారుజామున అనుమానాస్పదంగా సంచరిస్తున్న ఐదుగురిని అదుపులోకి తీసుకుని వేలిముద్రలను పరిశీలించగా గత నేరచరిత్ర ఉన్నట్లు తేలింది. విచారణలో కామారెడ్డిలో ఇంటి చోరీతో పాటు మరికొన్ని ఇళ్లలో చోరీలకు యత్నించామని, పోలీసు పెట్రోలింగ్ను గమనించి అక్కడి నుంచి పరారైనట్లు నిందితులు అంగీకరించారు.

అంతర్రాష్ట్ర నేర కార్యకలాపాలు

విచారణలో నిందితులు ఒక అంతర్రాష్ట్ర ముఠాగా ఏర్పడి మహారాష్ట్ర, పశ్చిమ బెంగాల్తో పాటు పలు రాష్ట్రాల్లో బ్యాంకులు, ఏటీఎంలు, మార్కెట్లు, బస్టాండ్లు వంటి రద్దీ ప్రాంతాలను లక్ష్యంగా చేసుకుని నేరాలకు పాల్పడుతున్నట్లు వెల్లడైంది. హాత్ సఫాయి, బాబాగిరి, నకిలీ నోట్ల తనిఖీ పేరుతో ప్రజలను మోసం చేసి నగదు, బంగారు ఆభరణాలను అపహరించడం, రాత్రి వేళల్లో ఇళ్లలో చోరీలు చేయడం, అవసరమైతే కత్తులతో బెదిరించి దోపిడీలకు పాల్పడడం వీరి నేర విధానంగా పోలీసులు వెల్లడించారు.