విశాఖ భాగస్వామ్య సదస్సు నవంబర్ 12, 13న: సీఎం ఆదేశాలు

Navigating Change: Leadership, Technology, Trust and Trade in a Transforming World' అనే థీమ్‌తో ఈ సదస్సు జరగనుంది. ఈ సదస్సులో ఎంఓయూలు, మినిస్టీరియల్ సెషన్స్, ప్లీనరీ, కంట్రీ సెషన్స్, బీ2బీ, బీ2జీ సమావేశాలతో పాటు రెండు రోజుల పాటు కార్యక్రమాలు నిర్వహించేలా అన్ని ఏర్పాట్లు చేయాలని సీఎం అధికారులను ఆదేశించారు. జాతీయ, అంతర్జాతీయ కంపెనీల ప్రతినిధులు, కేంద్ర మంత్రులు, వివిధ దేశాల డెలిగేట్స్‌ను ఆహ్వానించాలని సూచించారు.

వివిధ రాష్ట్రాల సీఎంలకు లేఖలు రాయాలని, దేశ విదేశాల్లో పెద్ద ఎత్తున ప్రచారం కల్పించాలని సీఎం చెప్పారు. జూలై నుంచి సెప్టెంబర్ వరకు దేశవిదేశాల్లో రోడ్ షోలు చేపట్టాలని ఆదేశించారు. ఢిల్లీ, బెంగళూరు, చెన్నై, ముంబై, కోయంబత్తూర్, అహ్మదాబాద్, హైదరాబాద్‌ వంటి నగరాల్లో రోడ్ షోలు నిర్వహించేందుకు ప్రణాళికలు సిద్ధం చేస్తున్నట్లు అధికారులు తెలిపారు.

ప్రధాన సదస్సు కంటే ముందుగానే విశాఖ, రాజమండ్రి లేదా కాకినాడ, అమరావతి, అనంతపురం, తిరుపతి నగరాల్లో ప్రాంతీయ భాగస్వామ్య సమావేశాలు నిర్వహించాలని సూచించారు. ఈ ప్రాంతీయ సదస్సుల్లో ఎంఓయూలు కుదుర్చుకునేలా ఏర్పాట్లు చేస్తున్నామని అధికారులు తెలిపారు. ఏయే ప్రాంతాల్లో ఏయే రంగాలకు చెందిన పరిశ్రమలు స్థాపించేందుకు అవకాశం ఉంటుందో బేరీజు వేసుకుని ప్రణాళికలు చేపట్టినట్లు వివరించారు.

భాగస్వామ్య సదస్సులు అంటే కేవలం పెట్టుబడులు, ఎంఓయూలు మాత్రమే కాదని, కీలక అంశాలపై చర్చ జరగాలని సీఎం చంద్రబాబు అన్నారు. ఎన్ని పెట్టుబడులు, ఎంఓయూలు కుదిరాయనే దానికంటే నాలెడ్జ్ షేరింగ్ ఎంత వరకు చేసుకోగలుగుతున్నామనేది ముఖ్యమని తెలిపారు. ప్రజలు, యువత ఈ సదస్సుల్లో జరిగే కార్యక్రమాలపై చర్చించుకోవాలని, వినూత్నంగా ఆయా రంగాలను ఏ విధంగా అభివృద్ధి సాధించాలనే ఆలోచనలు రేకెత్తించాలని సూచించారు. ఫ్యూచరిస్టిక్ రంగాలపై ఎక్కువ దృష్టి సారించాలని, ప్రముఖ యూనివర్శిటీల నిపుణులను భాగస్వామ్య సదస్సుకు రప్పించాలని చెప్పారు. అమరావతిలో సీఐఐ గ్లోబల్ లీడర్ షిప్ సెంటర్‌ను ఏర్పాటు చేసుకోబోతున్నామని, పబ్లిక్ పాలసీలపై కీలక చర్చలు జరగాలని, వ్యాపారాలు, పెట్టుబడులతో పాటు సవాళ్లను ఎలా అధిగమించాలనే అంశాలపై రకరకాల చర్చలు జరగాలని సూచించారు. వ్యవసాయం, ఉద్యానరంగం, ప్రకృతి వ్యవసాయం, సర్క్యులర్ ఎకానమీ, ఆధ్యాత్మికత, స్ట్రెస్ ఫ్రీ వర్క్ వంటి అంశాలపై చర్చించాలని తెలిపారు.

సదస్సును వినూత్నంగా నిర్వహించాలని, ప్రాంతాల వారీగా సదస్సులు నిర్వహిస్తే ప్రజలు, యువత, విద్యార్థుల భాగస్వామ్యం పెరుగుతుందని సీఎం చంద్రబాబు చెప్పారు. యువతలోని ఇన్నోవేషన్లను పారిశ్రామిక పెద్దల దృష్టికి తీసుకెళ్లడం సాధ్యమవుతుందని, ప్రాంతీయ సదస్సుల్లో స్టార్టప్ కంపెనీలకు, ఇన్నోవేషన్లకు అగ్రభాగం ఉండాలని అన్నారు. ప్రాంతీయ సదస్సుల్లోనూ ఎంఓయూలు కుదుర్చుకునే అంశానికి ప్రాధాన్యత ఇవ్వాలని సూచించారు. ఇలాంటి కార్యక్రమాలు వివిధ ప్రాంతాల్లో జరిగితే ప్రభుత్వం చేస్తున్న కృషి ప్రజలకు అర్థమవుతుందని, ఈ సదస్సుల్లో జెన్ జీ భాగస్వామ్యం ఉండేలా చూడాలని సీఎం చంద్రబాబు చెప్పారు.

ఈ సన్నాహక సమీక్ష సమావేశానికి మంత్రులు టీజీ భరత్, కొండపల్లి శ్రీనివాస్, పొంగూరు నారాయణ, కందుల దుర్గేష్, గొట్టిపాటి రవికుమార్, సీఐఐ డైరెక్టర్ జనరల్ చంద్రజీత్ బెనర్జీ, వివిధ శాఖల ఉన్నతాధికారులు పాల్గొన్నారు.