ఎన్నికల అక్రమాలపై రెడ్యం ఫైర్: ప్రజాస్వామ్యాన్ని ఖూనీ చేశారు

జగన్పై రాజకీయంగా పోరాడేందుకు అంశాలు లేక షర్మిల, వివేకానందరెడ్డి కేసులను కూటమి నేతలు రాజకీయ అస్త్రాలుగా ఉపయోగించుకుంటున్నారని రెడ్యం విమర్శించారు. న్యాయస్థానాల్లో ఉన్న అంశాలను రాజకీయ సభల్లో పదేపదే ప్రస్తావిస్తూ ప్రజలను తప్పుదోవ పట్టించే ప్రయత్నం చేస్తున్నారని ఆరోపించారు. వివేకానందరెడ్డి హత్య కేసు విషయంలో జగన్, భారతమ్మపై ఆరోపణలు చేయడం సరికాదన్నారు. న్యాయస్థానాల పరిధిలో ఉన్న అంశాలపై రాజకీయ ప్రయోజనాల కోసం తీర్పులు వచ్చినట్లుగా మాట్లాడటం సరికాదని పేర్కొన్నారు. జగన్ను ఎదుర్కోవాలంటే ప్రజల ముందుకు వెళ్లాలి.. కేసుల వెనుక దాక్కోవడం ఎందుకు అని ప్రశ్నించారు.

ఎలహంక ప్యాలెస్కు సంబంధించిన ఆస్తుల విషయంలో ఎల్లో మీడియా ప్రచారంపై రెడ్యం తీవ్రంగా స్పందించారు. భారతమ్మ తల్లి డా. ఈసీ సుగుణమ్మ తన కుమార్తె భారతమ్మకు ఆస్తి ఇచ్చినట్లయితే.. ఆ ఆస్తి షర్మిలకు ఎలా చెందుతుందని ప్రశ్నించారు. ఆ ఆస్తి షర్మిలది అని చెప్పడానికి ఆధారం ఏమిటి ఎవరి ఆస్తి ఎవరికి చెందుతుందో నిర్ణయించేది చట్టం. ఎల్లో మీడియా కథనాలు కాదు అని అన్నారు. ఈ విషయంలో ఆంధ్రజ్యోతి ఎండీ వేమూరి రాధాకృష్ణ స్పష్టమైన సమాధానం చెప్పాలని సవాల్ విసిరారు. కుటుంబ ఆస్తి వివాదాలను రాజకీయంగా ఉపయోగించుకుని జగన్ను దుర్మార్గుడిగా చిత్రీకరించే ప్రయత్నం జరుగుతోందని రెడ్యం ఆరోపించారు. కుటుంబ వ్యవహారాలను రాజకీయ ప్రచారానికి ఉపయోగించుకోవడం దిగజారుడు రాజకీయాలకు నిదర్శనమని అన్నారు.

వైఎస్సార్సీపీ నేతలపై చిన్న ఆరోపణ వచ్చినా రోజంతా కథనాలు, చర్చలు నిర్వహించే ఎల్లో మీడియాకు ఎన్నికల సమయంలో జరిగిన నామినేషన్ల అడ్డగింతలు, దౌర్జన్యాలు, భౌతిక దాడులు ఎందుకు కనిపించలేదని రెడ్యం ప్రశ్నించారు. ఒక అభ్యర్థి నామినేషన్ పత్రాన్ని చించివేస్తే అది వార్త కాదా ప్రత్యర్థి అభ్యర్థిని నామినేషన్ వేయకుండా అడ్డుకుంటే అది ప్రజాస్వామ్య అంశం కాదా అధికారులను ప్రభావితం చేశారనే ఆరోపణలు వస్తే వాటిపై ప్రశ్నించాల్సిన బాధ్యత మీడియాకు లేదా అని ప్రశ్నించారు. ఎన్నికల ప్రక్రియలో జరిగిన ప్రతి ఘటనను సమాన దృష్టితో చూడాల్సిన మీడియా ఒకవైపు మాత్రమే కథనాలు రాయడం పత్రికా విలువలకు విరుద్ధమని విమర్శించారు.

పులివెందులలో వైఎస్సార్సీపీ ఎస్టీ నేత నగరిగుట్ట నాగరాజుకు చెందిన ఎక్స్యూవీ వాహనం దహనమైన ఘటనపై కూడా రెడ్యం తీవ్ర ఆరోపణలు చేశారు. వైఎస్ జగన్ పిలుపుతో వైఎస్సార్సీపీ శ్రేణుల్లో పెరిగిన ప్రచార ఉత్సాహాన్ని అడ్డుకునేందుకే ఈ ఘటనకు పాల్పడ్డారని ఆరోపించారు. వాహనం దహనం చేయడం ద్వారా నాయకులను, కార్యకర్తలను భయపెట్టవచ్చని భావిస్తే అది వారి భ్రమే అన్నారు. ఈ ఘటనపై సమగ్ర విచారణ జరిపి వాస్తవాలను ప్రజల ముందుంచాలని డిమాండ్ చేశారు. దర్యాప్తు పూర్తికాకముందే నిందను వైఎస్సార్సీపీ నేతలపై మోపే ప్రయత్నాలు జరగకూడదని అన్నారు.

ఎన్నికల ప్రక్రియను ఎంతగా ప్రభావితం చేసినా ప్రజల మనసులోని అభిప్రాయాన్ని మార్చలేరని రెడ్యం అన్నారు. చంద్రబాబు, పవన్ కల్యాణ్, లోకేశ్ సహా కూటమి నేతలకు 2029 ఎన్నికల్లో ప్రజలు తగిన సమాధానం చెబుతారని పేర్కొన్నారు. అధికారం శాశ్వతం కాదు.. ప్రజల తీర్పే అంతిమం. అధికార బలంతో ప్రత్యర్థులను అణచివేయవచ్చు.. కానీ ప్రజల మనసులను మార్చలేరు అని రెడ్యం అన్నారు. వైఎస్ జగన్ హయాంలో అమలు చేసిన సంక్షేమ పథకాలను ప్రజలు మరచిపోలేదని, భవిష్యత్తులో వైఎస్సార్సీపీ మరింత బలంగా ప్రజల్లోకి వెళ్తుందని తెలిపారు.

ప్రజాస్వామ్యాన్ని కాపాడటానికి ప్రజలు అప్రమత్తంగా ఉండాలని ఆయన పిలుపునిచ్చారు. ఎన్నికల్లో జరిగిన ప్రతి పరిణామాన్ని చరిత్ర నమోదు చేస్తుందని, అధికార దుర్వినియోగానికి ప్రజల తీర్పే తుది సమాధానం అవుతుందని రెడ్యం స్పష్టం చేశారు.