అన్నమయ్య జిల్లా పోలీసు దళంలోకి తార జాగిలం: నేరస్తులను పసిగట్టేందుకు ప్రత్యేక శిక్షణ

అన్నమయ్య జిల్లాలో నేరాలను అరికట్టేందుకు, నేరస్తులను పట్టుకునేందుకు పోలీసు శాఖలో బెల్జియన్ మాలినోయిస్ జాతికి చెందిన తార అనే జాగిలం చేరింది. ఈ జాగిలం పేలుడు పదార్థాలను గుర్తించడంతో పాటు, గాలి వాసన ద్వారా నేరస్తులను ట్రాక్ చేయడంలో ప్రత్యేక శిక్షణ పొందింది.

మదనపల్లె కేంద్రంగా పనిచేస్తున్న అన్నమయ్య జిల్లా పోలీసు శాఖలో అసాంఘిక శక్తుల ఆటకట్టించేందుకు, నేరస్తులను పసిగట్టేందుకు ఒక కొత్త సభ్యురాలు చేరింది. ఆమె పేరు తార, బెల్జియన్ మాలినోయిస్ జాతికి చెందిన జాగిలం. ఈ జాగిలం మంగళగిరిలో సుమారు 11 నెలల పాటు కఠిన శిక్షణ పొందింది.

పేలుడు పదార్థాలను గుర్తించడంలో, గాలి వాసన ద్వారా నేరస్తులను ట్రాక్ చేయడంలో తారకు ప్రత్యేక నైపుణ్యం ఉంది. ఈ జాగిలం రాకతో జిల్లాలో నేరాల నియంత్రణకు, దర్యాప్తునకు మరింత బలం చేకూరనుంది.