ఫోర్జరీ కేసులో లేడీ డాన్ సులోచన అనుచరుడు శ్రీరాములు నాయుడు అరెస్ట్

ఆ కేసులో ఆమెకు ప్రధాన అనుచరుడైన కడియాల శ్రీరాములు నాయుడు, రెడ్డప్ప నాయుడు కాలనీలో కాపురం ఉంటూ, సులోచనతో చేతులు కలిపి మదనపల్లె పట్టణ, రూరల్ ప్రాంతాల్లో నకిలీ డాక్యుమెంట్లు సృష్టించి కోట్లకు పైగా విలువైన భూములను స్వాహా చేసినట్లు సీఐ తెలిపారు. స్థానికంగా ఉండే బాధితులు వెంకటరమణారెడ్డి, వెంకటేష్ నాయుడు కలిసి గతంలో అమ్మ చెరువుమిట్ట సమీపంలో వెంచర్ వేసి ప్లాట్లు విక్రయించారు. వెంకటరమణారెడ్డికి వారసత్వంగా వచ్చిన రెండు ప్లాట్లు, భాగానికి వచ్చిన రెండు ప్లాట్లతో సహా మొత్తాన్ని సులోచన 2021లో వెంకటేశ్ నాయుడు సంతకాన్ని ఫోర్జరీ చేసి అక్రమంగా రిజిస్ట్రేషన్ చేసుకున్నారని సీఐ తెలిపారు.

బాధితుల ఫిర్యాదుతో కేసు నమోదు

కోనేటి సులోచన తన అనుచరులతో కలిసి వెంకటరమణారెడ్డిపై తరచూ గొడవలు పెట్టుకుని, ఆయన్ను చంపుతామని బెదిరిస్తున్నారని, బాధితుడు ఇచ్చిన ఫిర్యాదు మేరకు కోనేటి సులోచన, ఆమె తల్లి రెడ్డెమ్మ, సోదరుడు శ్రీనాధ్, అనుచరులు మోహన్, సీటీఎం రోడ్డులోని రెడ్డెప్ప నాయుడు కాలనీకి చెందిన కడియాల శ్రీరాములు నాయుడులపై కేసు నమోదు చేశామని సీఐ తెలిపారు. ఈ కేసులో సులోచన, మోహన్ ను ఇటీవలే అరెస్టు చేసి రిమాండ్ కు తరలించామని సీఐ పేర్కొన్నారు. రెడ్డెమ్మ, శ్రీరాములు నాయుడు పరారీలో ఉన్నారని, దర్యాప్తులో భాగంగా శ్రీరాములు నాయుడు పట్టుబడడంతో అరెస్టు చేసి స్థానిక కోర్టులో హాజరుపరిచామని చెప్పారు. రెడ్డమ్మ పరారీలో ఉందని, ఆమెను కూడా త్వరలో అరెస్టు చేస్తామని సీఐ తెలిపారు.

ఇతర పోలీస్ స్టేషన్లలోనూ కేసులు

సులోచనతో పాటు శ్రీరాముల నాయుడు, మోహన్ లపై వన్ టౌన్, టూ టౌన్, తాలూకా పోలీస్ స్టేషన్లలో ఇప్పటికే కేసులు నమోదయ్యాయని, భూ కబ్జాలు, దాడులు, భయాందోళనలకు పాల్పడితే ఎంతటివారినైనా శిక్షించక తప్పదని సీఐ హెచ్చరించారు.